Xorij razvedka xizmatlari Xitoy milliy xavfsizligiga jiddiy tahdid solmoqda. Bu haqda mamlakat Mudofaa vazirligi rasmiy vakili U Syanga tayanib, “Kommersant” xabar berdi.
U Syan OAVlarda Xitoy hukumati mamlakat hududida notijorat tashkilot niqobi ostida faoliyat ko‘rsatib, xorijdan moliyalashtirilgan razvedka tarmog‘ini aniqlagani to‘g‘risida tarqalgan xabarlarga izoh bergan.
Matbuot anjumani davomida Xitoy Mudofaa vazirligi vakili xorij maxsus xizmatlarining xatti-harakati, xususan, Xitoy harbiy tuzilmalari uchun tahdid tug‘dirayotganini ma’lum qilgan. Uning so‘zlariga ko‘ra, so‘nggi paytlarda xorij razvedkalari va “dushman kuchlari” “maxfiy ma’lumotlarni o‘g‘irlash va sizdirish bo‘yicha” harakatini faollashtirgan. “Milliy xavfsizlikka putur yetkazadigan va harbiy sirlarni oshkor qiladigan har qanday harakat qonun bilan qattiq jazolanishi kerak”, — deydi u.
Xitoyning Global Times gazetasining yozishicha, notijoriy tashkilot niqobi ostida faoliyat yuritganlikda gumonlangan razvedka tarmog‘i dengiz chiqindilarini kuzatish bo‘yicha loyihani amalga oshirib kelgan. Shu orqali tashkilot Janubiy Xitoy, Sharqiy Xitoy va Sariq dengiz, shuningdek, Boxay ko‘rfazida 100 ta punktdan iborat monitoring tarmog‘ini yaratgan. Ularning 22 tasi Xitoy harbiy obyektlari yaqinida joylashgan, bu esa “Xitoy harbiy xavfsizligiga to‘g‘ridan to‘g‘ri tahdid hisoblanadi”. Tashkilot “maxfiy ma’lumotlarni to‘plash” va ularni xorijga uzatish bilan shug‘ullangani aytilmoqda. Mazkur tashkilot nomi oshkor etilmagan, ammo u “dunyo okeani masalalari” bilan shug‘ullangani va so‘nggi yillarda xorijdan moliyalashtirilgani ma’lum. Uni qaysi davlatlar moliyalashtirgani noma’lum.
Avvalroq Pentagon Xitoy 2027-yilga qadar qurollanishga 700 ta yadro kallagini yetkazib berishni, 2030-yilga borib esa ularning sonini mingga yetkazishni rejalashtirayotgani, AQSh beton obyektlarni yo‘q qiladigan yangi aviabombani sinovdan muvaffaqiyatli o‘tkazgani to‘g‘risida xabar berilgandi.
Izoh (0)