Polshaning Vendjin tumanida (germaniya chegarasi yaqinida joylashgan) xorijliklar uchun mo‘ljallangan qo‘riqlanuvchi markazda migrantlar tartibsizlik uyushtirdi, deb xabar beradi “RBK”.
wPolityce.pl portalining ma’lumotlariga ko‘ra, yuzlab migrantlar markaz hududidan qochib ketish maqsadida to‘siqlarni sindirib chiqishga uringan. Nashrning ta’kidlashicha, ushbu obyekt 2021-yilning yozida sobiq harbiy o‘quv markaz o‘rnida qurilgan. Obyekt bir vaqtning o‘zida bir necha yuz kishini qabul qilishga qodir. Qayd etilishicha, u yerga respublika hududiga noqonuniy ravishda kelgan xorijliklar yuboriladi.
Lubuska gazetasining ma’lum qilishicha, dastlabki ma’lumotlarga ko‘ra, tartibsizlik markaz rahbariyati bir necha o‘n kishidan iborat guruhni Iroqqa qaytarib yuborishga tayyorlangani sabab yuzaga kelgan, chunki ular mamlakatda “yashash huquqini olish shartlariga mos kelmagan”.
RMF radiostansiyasi ma’lumotlariga ko‘ra, hozirda ushbu markaz hududida 604 nafar xorijlik mavjud. Ularning barchasi erkaklar bo‘lib, 358 nafari — Iroq fuqarolari. Qolganlari — asosan afg‘onlar.
Politsiyaning ma’lum qilishicha, migrantlar markaz hududidan uskunlar va mebellarni olib chiqib, yoqib yuborishga uringan. Shundan so‘ng, ular to‘siqlarni buzmoqchi bo‘lgan. Polsha Chegara xizmati boshqarmasining mintaqaviy bo‘limi matbuot Ionna Konchnyakning so‘zlariga ko‘ra, tartibsizlikni 100 ga yaqin migrant uyushtirgan. “Markaz yaxshi himoyalangan va bir nechta panjralar bilan o‘ralgan. Ularning birortasi kesib o‘tilmagan”, — deya qo‘shimcha qiladi u.
Polsha Chegara xizmati matbuot kotibi Anna Mixalskaya markaz hududiga ikkitalik, ayrim joylariga esa uchtalik panjaralar o‘rnatilganini bildirgan. Shu sababli u noqonuniy migrantlardan birortasi markaz hududidan qochib keta olmaganini ma’lum qilgan.
Keyinroq Lyubushkoe politsiyasi tartibsizlik bostirilganini ma’lum qildi. “600 dan ortiq migrant saqlanayotgan Vendjindagi qo‘riqlanadigan markaz to‘siqlarini kesib o‘tishga bo‘lgan urinishdan keyin vaziyat barqarorlashdi. Hech kim qochishga muvaffaq bo‘lmagan”, — deyiladi xabarda.
Eslatib o‘tamiz, 8-noyabr kuni ertalab Belarus va Yevropa Ittifoqi davlatlari chegarasida vaziyat keskinlashdi. Belarus ommaviy axborot vositalari mamlakatning Polsha bilan chegarasi tomonga harakatlanayotgan muhojirlar karvoni aks etgan videolarni e’lon qildi. 11-noyabr kuni Buyuk Britaniya, AQSh va Yevropa Ittifoqi davlatlari Belarus hukumatini Polsha—Belarus chegarasidagi migratsiya inqirozini sun’iy ravishda yaratganlikda aybladi.
Izoh (0)