Belarusda Iroqqa qaytishni istamagan muhojirlar miting uyushtirib, ularni Yevropa Ittifoqiga kiritishni talab qildi (video)

Belarusning Bruzgi logistika markazida Iroqqa qaytishni istamayotgan muhojirlar miting uyushtirdi. Ular o‘zlarini Yevropa Ittifoqiga kiritishni talab qilmoqda. Voqea joyidan olingan videolar ATN NEWS Telegram kanalida e’lon qilingan.

Kadrlardan ko‘rinib turibdiki, bir necha o‘nlab muhojirlar ingliz tilida “biz Iroqqa qaytib bora olmaymiz” deb yozilgan plakatlarni ko‘tarib olgan. Muhojirlarning  jurnalistlarga aytishicha, ular Yevropa Ittifoqidagi istalgan mamlakat — Germaniya, Fransiya, Belgiyada yashashga rozi. Miting tinch o‘tgan va Belarus—Polsha chegarasiga qaratilgan navbatdagi hujumga aylanib ketmagan. Muhojirlar turli shiorlar bilan hayqirgan. Ular o‘rab qo‘yilgan hududdan chetga chiqmagan.

Bundan avval, 25-noyabrga o‘tar kechasi tosh va tayoqlar bilan qurollangan 200 ga yaqin muhojir Belarus—Polsha chegara chizig‘ini buzib o‘tgani haqida xabar berilgan. Ular Polsha hududida hibsga olingan va Belarusga qaytarib yuborilgan.

Eslatib o‘tamiz, Belarus prezidenti Aleksandr Lukashenko Grodno viloyati rasmiylariga Belarus—Polsha chegarasidagi muhojirlar uchun yotoq tashkillashtirish bo‘yicha topshiriq bergandi. Boshpana muhojirlar to‘plangan “Bruzgi—Kuznitsa” chegara punkti yaqinida logistik markazda tashkil etilgan.

8-noyabr kuni ertalab Belarus va Yevropa Ittifoqi davlatlari chegarasida vaziyat keskinlashdi. Belarus ommaviy axborot vositalari mamlakatning Polsha bilan chegarasi tomonga harakatlanayotgan muhojirlar karvoni aks etgan videolarni e’lon qildi. 11-noyabr kuni Buyuk Britaniya, AQSh va Yevropa Ittifoqi davlatlari Belarus hukumatini Polsha—Belarus chegarasidagi migratsiya inqirozini sun’iy ravishda yaratganlikda aybladi.

Yevropa Ittifoqi ma’muriyati muhojirlarni Polsha chegarasiga yetkazishni tashkil etishda ishtirok etgan barcha kompaniyalar va shaxslarga nisbatan sanksiyalar qo‘llash rejasini e’lon qilgach, bir qancha aviakompaniyalar Iroq va boshqa bir qator davlatlar fuqarolarini Belarusga tashishni chekladi. Jumladan, O‘zbekiston hududi orqali Iroq, Suriya, Yaman, Livan, Liviya va Afg‘oniston fuqarolarining  Belarusga parvozi vaqtincha cheklandi.

Bloomberg xabariga ko‘ra, Yevropa Ittifoqi muhojirlarni Belarus va Polshaga tashiydigan firmalarga qarshi sanksiyalar joriy qilmoqchi.