Qo‘qonlik ota ikki farzandi uchun aliment o‘rniga xonadon va Nexia berdi

Qo‘qon shahrida qarzdor Sh.U. ikki nafar farzandi uchun aliment pullari o‘rniga ko‘p qavatli uylardan xonadon va Nexia avtomobilini berdi. Bu haqda Majburiy ijro byurosi “Daryo”ga xabar qildi.

Qayd etilishicha, MIBning Qo‘qon shahar bo‘limiga qarzdor otadan undiruvchi M.U. foydasiga ikki nafar voyaga yetmagan farzandining moddiy ta’minoti uchun aliment undirish haqidagi ijro hujjati kelib tushgan. Sh.U. farzandlari voyaga yetguniga qadar to‘lanadigan aliment pullari evaziga Qo‘qon shahrida joylashgan uy va Nexia avtomashinasini sobiq turmush o‘rtog‘ining nomiga o‘tkazib bergan.

Kelishuv bitimi fuqarolik ishlari bo‘yicha Qo‘qon tumanlararo sudi tomonidan tasdiqlanib, qarzdorga nisbatan qo‘zg‘atilgan ijro ishi tamomlangan.