O‘zbekiston shifoxonalarida O‘RVIga chalingan bolalar uchun qo‘shimcha 5 mingdan ortiq o‘rin-joy tashkil qilindi, deb xabar bermoqda Sog‘liqni saqlash vazirligi.
Ma’lum bo‘lishicha, oktabr oyidan boshlab mamlakatda bolalar o‘rtasida o‘tkir respirator virusli infeksiyalarning davriy ko‘tarilishi kuzatilayotgani sababli tibbiyot muassasalariga murojaatlar va Tez yordam xizmatiga chaqiriqlar soni sezilarli darajada ortgan. SSV ushbu kasallikka chalingan bemor bolalarga o‘z vaqtida sifatli tibbiy xizmat ko‘rsatish, shifoxonalarda qo‘shimcha o‘rin-joylar tashkil etish, bu orqali tibbiyot muassasalariga tushayotgan yuklamalarni kamaytirish bo‘yicha ishlar olib borgan.
Jumladan, o‘rganishlar natijasida Toshkent shahar shifoxonalarida qo‘shimcha 884 ta, mamlakat bo‘yicha 5 062 ta statsionar o‘rin-joy tashkil etilib, 25-noyabr holatiga ko‘ra, poytaxt shifoxonalaridagi jami o‘rin-joylar 3 521 ta, O‘zbekiston bo‘yicha esa qariyb 19 800 taga yetkazilgan. Ayni paytda Toshkent shahar tibbiyot muassasalarida bo‘sh o‘rinlar soni 661 ta, respublika bo‘yicha 4 700 tani tashkil qilmoqda.
Avvalroq Sog‘liqni saqlash vazirligi Toshkent shahrida bolalar o‘rtasida mavsumga xos bo‘lgan o‘tkir respirator virusli infeksiyalarga chalinish holatlari ko‘p kuzatilayotganini, 1—18-noyabr kunlari tez yordamga bolalar bo‘yicha 20 mingdan ziyod chaqiriq kelib tushganini xabar qilgandi.
Bu orqali poytaxtdagi bolalar klinik shifoxonalariga yuklamalar sezilarli darajada ortgani sababli sog‘liqni saqlash vaziri Bahodir Musayev boshchiligida ishchi guruh tuzilib, 13-noyabr tunda poytaxt shifoxonalaridagi vaziyat o‘rganilgan edi.
Eslatib o‘tamiz, Toshkentda yosh bolalar orasida gripp bilan kasallanish holati keskin ko‘paygani, bolalarning grippga chalinish holati bilan Toshkent pediatriya tibbiyot klinikasiga har kuni 400 ga yaqin murojaat kelayotgani xabar qilingan.
Izoh (0)