Farg‘onada mast er 29 yoshli xotinini pichoqlab, o‘ldirib qo‘ydi

Farg‘onada 35 yashar er oilaviy kelishmovchilik sabab 29 yoshli turmush o‘rtog‘ini pichoqlab qo‘ydi. Bu haqda “Daryo” muxbiri xabar bermoqda.

Bosh prokuratura axborot xizmati rahbari Hayot Shamsutdinovning “Daryo” muxbiriga ma’lum qilishicha, voqea 23-noyabr kuni soat 14:30 larda Buvayda tumanidagi “Yashnarobod” mahallasida sodir bo‘lgan. 1986-yilda tug‘ilgan fuqaro Z.U. mast holatda qaynonasining yashash xonadoniga borib, turmush o‘rtog‘i Yu.U. bilan o‘zaro janjallashgan. Erkak qo‘lidagi oshxona pichog‘i bilan rafiqasining ko‘kragiga qasddan zarba bergan. Buning oqibatida ayol og‘ir tan jarohati olib, voqea joyida vafot etgan.

Qayd etilishicha, holat yuzasidan Jinoyat kodeksining 97-moddasi (qasddan odam o‘ldirish) 1-qismi bilan jinoyat ishi qo‘zg‘atilgan. Z.U.ga nisbatan qamoqqa olish tarzidagi ehtiyot chorasi qo‘llangan. Jinoyat ishi yuzasidan Buvayda tumani prokuraturasi tomonidan dastlabki tergov harakatlari olib borilmoqda.

Bundan avval Qashqadaryoda mast er turmush o‘rtog‘i bilan janjallashish oqibatida uni urib, o‘ldirib qo‘ygani haqida xabar berilgan edi.