22-noyabr kuni AOKAda bo‘lib o‘tgan brifingda Bandlik va mehnat munosabatlari vazirligi axborot xizmati rahbari Mavjuda Mirzayeva majburiy mehnatni oldini olish, mehnatni muhofaza qilish va aholi bandligi masalalari yuzasidan ma’lumot berdi.
Ma’lum qilinishicha, 2021-yilning 10 oyi davomida 558 ta sodir bo‘lgan baxtsiz hodisalar oqibatida 623 nafar xodim jabrlanib, shundan 166 nafar xodim halok bo‘lgan, 432 nafari og‘ir tan jarohati va 25 nafari yengil tan jarohati olgan.
Mazkur baxtsiz hodisalarning barchasi belgilangan tartibda maxsus tekshirish komissiyalari tomonidan tekshirildi, shuningdek, tekshirish jarayonida baxtsiz hodisalarni kelib chiqish sabablari aniqlanib, baxtsiz hodisa oqibatida jabrlangan 623 nafar ishchi va xodimlarni qonuniy huquqlarini himoya qilish bo‘yicha xulosalar qilingan.
Avvalroq Buxoro viloyati Kogon shahrida tuproq o‘pirilishi oqibatida 2 kishi halok bo‘lgani, Davlat mehnat inspeksiyasi ish vaqtida vafot etgan Bosh prokuraturaning 33 yoshli xodimi ishi bo‘yicha izoh bergani, O‘zbekistonda 2021-yil boshidan buyon 5 kishi sanoat korxonalaridagi baxtsiz hodisalar oqibatida vafot etgani to‘g‘risida xabar berilgandi.
Eslatib o‘tamiz, 20-yanvar kuni “Yangi Angren” issiqlik elektr stansiyasining profilaktika choralarini ko‘rish uchun to‘xtatilgan 5-energiya blokida chang-ko‘mirli havo aralashmasining portlashi sodir bo‘lgan, portlash oqibatida uch kishi halok bo‘lgan va yana uch kishi jarohat olgandi. Keyinroq portlagan sexning rahbari o‘zini osib qo‘ygani ma’lum bo‘lgan.
Izoh (0)