“Bloger Fotima Jo‘rayeva kaltaklanmagan, aksincha, o‘zi janjal chiqarishga uringan” — “Andijon hududiy elektr tarmoqlari”

Bloger Fotima Jo‘rayeva o‘zining Facebook sahifasida Andijon viloyati Ulug‘nor tumani elektor tarmoqlari korxonasi bosh hisobchisi tomonidan kaltaklanganini aytib, murojaat qilgani to‘g‘risida xabar berilgandi. “Andijon hududiy elektr tarmoqlari”ning “Daryo”ga ma’lum qilishicha, hisobchi blogerni tinchlantirmoqchi bo‘lgan, biroq u haqoratli so‘zlar bilan uni hamkasblari oldida obro‘sizlantirgan.

Bloger o‘z murojaatida tuman elektr tarmoqlari korxonasi bosh hisobchisidan o‘zi huquqshunos sifatida ishlab kelayotgan fermer xo‘jaligiga elektr energiyasidan qarzdorlikni sun’iy ravishda oshirilgani bo‘yicha tegishli hujjatlarni berishini talab qilganini bildirgan. Shunda korxona bosh hisobchisi unga qo‘pol munosabatda bo‘lib, uni haqorat qilib, yuziga urgani va qo‘l telefonini sindirib yuborganini aytib, aybdor korxona xodimlariga nisbatan qonuniy chora ko‘rishni so‘ragan.

“iPhone 12 Pro Max telefonimni olib, sindirib, meni urib, yerga yotqizib tepdi. To‘rt nafar erkak qarab turdi. Menga sherik bo‘lgan ikki fermer ayol bor edi, ularni ham urushdi. Telefonimni so‘raganimda uni sindirib berishdi, lekin ishlayapti”, — degan bloger.

Bosh prokuratura axborot xizmati rahbari Hayot Shamsutdinov hozirda mazkur murojaat bo‘yicha tuman IIB tomonidan tergovga qadar tekshiruv harakatlari olib borilayotganini ma’lum qildi. Uning bildirishicha, Fotima Jo‘rayevaning olgan tan jarohatlarini og‘irlik darajasini aniqlash maqsadida sud-tibbiy ekspertizasi tayinlangan, tekshiruv harakatlari Bosh prokuratura tomonidan nazoratga olingan.

“Hududiy elektr tarmoqlari” matbuot xizmati ham holatga munosabat bildirib, holat nazoratga olingani, buning uchun uchun maxsus komissiya tuzilib, Ulug‘nor tumaniga yuborilgani, o‘rganish yakunlari to‘g‘risida batafsil ma’lumot berilishini ma’lum qilgan.

“Andijon hududiy elektr tarmoqlari” korxonasi axborot xizmatining ma’lum qilishicha, komissiya tomonidan aniqlangan dastlabki ma’lumotlarga ko‘ra, Fotima Jo‘rayeva 18-noyabr kuni tuman elektr tarmoqlariga kelib, o‘zini bloger sifatida tanishtirgan va hech qanday hujjat taqdim etmasdan o‘zi faoliyat yuritayotgan Ulug‘nor tumanidagi “Istiqlol zar tolasi” fermer xo‘jaligining elektr energiyasi ta’minotiga oid to‘lovlar bo‘yicha joriy holatni aniqlashtiruvchi hujjatlarni talab qilgan. Korxona hisobchisi o‘z navbatida, ma’lumotlar faqat korxona rahbariga taqdim etilishi mumkinligini ma’lum qilgan.

E’lon qilingan video mojaroning qaysi vaqtida — oldinmi yoki keyin tavsirga olingani aytilmagan. Lekin kadrlardan ko‘rish mumkinki, bloger “telefonini berishlarini” talab qilmoqda. Bundan video olingan vaqtda uning telefonini kimdir olib qo‘ygani to‘g‘risida xulosa kelib chiqadi. To‘liq video berilmagani sabab bloger Fotima Jo‘rayevaning e’tiroz bildirgan joylari ko‘rsatilmagan.

Jo‘rayeva o‘z murojaatida fermer xo‘jaligining iste’mol qilingan elektr energiyasidan bo‘lgan qarzdorligini sun’iy oshirilishi to‘g‘risida gapirib o‘tgan. Komissiya a’zolarining ta’kidlashicha, ushbu holat o‘rganilganda tumanda paxtachilik-g‘allachilik yo‘nalishida faoliyat ko‘rsatayotgan “Istiqlol zar tolasi” fermer xo‘jaligi bilan Ulug‘nor tuman elektr ta’minoti korxonasi o‘rtasida elektr energiyasini yetkazib berish to‘g‘risidagi shartnoma tuzilgani aniqlangan.

Qayd etilishicha, ushbu fermer xo‘jaligiga Vazirlar Mahkamasining 2018-yil 3-maydagi qaroriga asosan, xo‘jalik tomonidan paxta va g‘alla ekinlarini yetishtirish uchun sarflangan elektr energiyasi uchun to‘lovlar Davlat budjetidan ajratiladigan subsidyalar hisobiga to‘lanishi belgilangan bo‘lib, mazkur qaror ijrosini ta’minlash maqsadida Ulug‘nor tumanida tuzilgan ishchi guruh tomonidan jadval ishlab chiqilgan. Unga ko‘ra, fermer xo‘jaligining jami 74,33 gektar ekin yer maydoniga 2021-yil hisobidan 47,2 gektar paxta va 27,13 gektar boshoqli don ekinlari ekilishi rejalashtirilgani, fermer xo‘jaligining ixtiyorida 1 dona yaroqli nasos agregati mavjudligi inobatga olinib, xo‘jalikka 2021-yil uchun limit sifatida 345,0 kVt elektr energiyasi ajratilgan.

Bundan tashqari, mazkur xo‘jalikning 2021-yil 1-yanvar holatiga iste’mol qilingan elektr energiyasi uchun to‘lovlardan 213,3 million so‘m qarzdorlik va muddati o‘tgan qarzdorlik uchun hisoblangan 19,9 millionso‘m penya, jami bo‘lib esa 233,2 million so‘m miqdorida qarzdorligi bo‘lgan.

Xo‘jalik tomonidan 2021-yilning 10 oyi davomida 47,1 million so‘mlik elektr energiyasi iste’mol qilingan bo‘lib, tuman moliya bo‘limi tomonidan fermer xo‘jaligi iste’mol qilgan elektr energiyasi uchun jami 238,5 million so‘m miqdoridagi mablag‘lar o‘tkazib berilgan. Shunday bo‘lsada, fermer xo‘jaligining iste’mol qilingan elektr energiyasi uchun to‘lovlardan 91 million so‘m miqdorida hamda 72,9 million so‘m miqdorida penya, jami 164 million so‘m miqdoridagi qarzdorligi qolgan.

“Andijon hududiy elektr tarmoqlari korxonasi” AJ voqeaga huquq-tartibot idoralari tomonidan huquqiy baho berilishi hamda dastlabki tergov jarayonlarigacha olib boriladigan o‘rganishlarga jamiyat tomonidan har tomonlama xayrixohlik ko‘rsatilishini ma’lum qilib o‘tadi”, — deyiladi munosabatda.