«Толибон» ҳақида маълумотлар тарқатишни тақиқловчи Facebook ижтимоий тармоғи Афғонистонда ҳокимият тепасига толиблар келганидан сўнг, бир қатор истисноларни қўллади, деб хабар беради «Коммерсантъ».
The Intercept нашри маълумотларига кўра, сентябрь охирида компания Афғонистон Ички ишлар вазирлигига янги йўл ҳаракати қоидаларига боғлиқ маълумотларни эълон қилишга рухсат берган. Шунингдек, мамлакат Соғлиқни сақлаш вазирлигига коронавирус тўғрисидаги маълумотларни жамлаган иккита постнинг жойлаштирилишига рухсат берилган. Бошқа идораларга бу каби рухсат берилмаган. Афғонистон ИИВ саҳифаси октябрь охирида ўчириб ташланган, ССВ саҳифасида эса 2 октябрдан буён янги постлар йўқ.
Facebook август ойида маълум бир вақт давомида амалдорларга толиблар Афғонистоннинг расмий ҳукуматини ифодалаши ва шу билан бирга ижтимоий тармоқларни блокаш хавфи йўқлигини маълум қилишига рухсат берган. Бу каби қисқа истисно август охиридан 3 сентябрга қадар ҳам қўлланилган: ўшанда Facebook’нинг барча фойдаланувчиларига «Толибон»нинг барча оммавий баёнотларини қайта эълон қилишга рухсат берилган, бу «нейтрал муҳокама, хабарлар ёки қоралашлар» учун мўлжалланмаган.
Facebook вакили Салли Алдус «бирламчи давлат хизматларини кўрсатиш борасидаги баъзи контентларни», хусусан, Соғлиқни сақлаш вазирлигига COVID-19 ҳақида иккита пост жойлаштиришга рухсат берганини тасдиқлаган. Шу билан бирга, ижтимоий тармоқ ИИВ, Молия вазирлиги ва Жамоат ишлари вазирлиги саҳифалари баҳоланганидан сўнг, уларни ўчириб ташлаган. У Facebook ўз сиёсатини қандай ишлаб чиққанини маълум қилишдан ва бу нима сабабдан оммавий эълон қилинмаганини айтишдан бош тортган, бироқ ижтимоий тармоқ «баъзи мамлакатлар ҳукуматларини тан олиш бўйича қарорлар қабул қилмаслиги, халқаро ҳамжамиятнинг бундай таърифларни тасдиқлаш ваколатларини эса ҳурмат қилишини» билдирган.
Аввалроқ «Толибон» аёллар иштирок этган бир қатор теледастурларни эфирга узатишни тақиқлагани, Афғонистондаги инқироз терроризм ва наркотрафикнинг ортиши билан тобора таҳдид солаётгани, ЖССТ Афғонистонда 1 млн бола очликдан вафот этиши мумкинлигини маълум қилгани тўғрисида хабар берилганди.
Изоҳ (0)