Ўзбекистон Қишлоқ хўжалиги вазирлиги делегацияси Англиянинг Глостершир графлигидаги Сайренсестер шаҳрида жойлашган Қироллик қишлоқ хўжалиги университети (Royal Agricultural University, RAU)да музокаралар ўтказди.
Вазирлик матбуот хизмати хабарига кўра, ташриф Ўзбекистонда ташкил этилаётган Халқаро қишлоқ хўжалиги университети учун таълим дастурлари ва бошқа масалаларни ишлаб чиқиш мақсадида амалга оширилган.
Делегацияга Тошкент давлат аграр университети ректори маслаҳатчиси профессор Мунира Аминова бошчилик қилди. Сафар давомида Қишлоқ хўжалиги вазирлиги мутахассислари RAU проректори ўринбосари, профессор Нил Равенскрофт, RAU Қишлоқ хўжалиги мактаби раҳбари Филип Хадсон ва тадқиқот директори, профессор Марк Хортон билан учрашган.
Делегация университет талабалари, ўқитувчилари ва бошқа ходимлари билан учрашган, талабалар шаҳарчаси ва университет хўжалигининг Farm491 агротехнологик инкубаторида бўлган. Делегацияга янги виртуал ўқув муҳити ва RAU талабаларининг ҳамкор университетлар билан, хусусан, Хитойда ўқитишда муваффақиятли қўлланилган бошқа инновациялари кўрсатилган.
RAU — Буюк Британиядаги энг кўҳна қишлоқ хўжалиги университети бўлиб, 1845 йилда ташкил этилган. Мазкур университет ва Ўзбекистон томони ўртасидаги ҳамкорлик бўйича музокаралар 2021 йил бошида бошланган эди.
Ёзда Ўзбекистон Қишлоқ хўжалиги вазирлиги, RAU ва Литванинг Буюк Витовт университети (Vytautas Magnus University, VDU) ўртасида уч томонлама ўзаро англашув ва ҳамкорлик меморандуми имзоланган бўлиб, унга асосан халқаро университетни ташкил этиш ва фаолиятини йўлга қўйиш бўйича музокаралар олиб борилмоқда.
Меморандумда университетлар ўртасида ўқитувчи ва талабалар алмашинувини йўлга қўйиш ҳамда фермерлар ва фермер хўжаликлари маслаҳатчиларининг малакасини ошириш ва алмашиш дастурларини амалга ошириш, лойиҳа ва дастурлар ишлаб чиқиш, қўшма илмий тадқиқотларни ўтказиш кўзда тутилган.
Изоҳ (0)