20-noyabr kuni Surxondaryo viloyati Sariosiyo tumanida “Zarchob-2” kichik gidroelektr stansiyasini ishga tushirishga bag‘ishlangan marosim bo‘lib o‘tdi. Bu haqda viloyat hokimligi matbuot xizmati xabar berdi.
Ma’lum qilinishicha, tantanali marosimda viloyat hokimi To‘ra Bobolov, “O‘zbekgidroenergo” AJ raisi, senator Abdug‘ani Sanginov, viloyat hokimi o‘rinbosarlari, tumanlar hokimlari, soha mutaxassislari, ommaviy axborot vositalari vakillari, nuroniylar hamda keng jamoatchilik vakillari ishtirok etgan.
38,2 megavattli mazkur stansiya to‘liq quvvatda ishlashi ortidan 40 ming aholi xonadonini elektr energiya bilan ta’minlash imkoniyati yaratiladi. “Zarchob-1” GES ham xuddi shunday salohiyatga ega.
“Gazeta.uz”ning yozishicha, ochilish marosimi oldidan so‘zga chiqqan viloyat hokimi To‘ra Bobolov loyihaning ahamiyatiga to‘xtalib o‘tgan.
“To‘palangdan kelayotgan suvdan 3 marotaba foydalanib, tok ishlab chiqaryapmiz. Surxondaryoga sovuq kelganiga 3-4 kun bo‘ldi. Ertalablari fuqarolarni qabul qilyapmiz, (ular — tahr.) birinchi masala elektr energiya deb kelyapti… O‘zbekiston mustaqil elektr energiya ishlab chiqarishni yo‘lga qo‘ymasa, baribir (muammolar bo‘laveradi). Bu loyihalar — kelajagimiz”, — deydi hokim.
“To‘palang daryosida 2006-yilda bor-yo‘g‘i 30 MVt energiya bor edi. Bugungi kunga kelib, 350 megavattga yetadigan loyihalarimiz bor. 2 ta ‘Zarchob’ning o‘zi jami 75 MVt energiya ishlab chiqaradi. 2022-yilga kelib, 175 megavattlik ‘To‘palang’ GES ishga tushiriladi. Undan keyingi loyihamiz Mizop-Kishtut stansiyasi. Uning bittasi 50 megavattlik, ikkinchisi 25 megavattlik, jami 75 megavatt elektr energiya chiqadi. Shuning uchun, To‘ra Abdiyevich aytganidek, 3 marotaba emas, 5 marotaba suvni aylantirib, elektr energiya olishga erishamiz”, — deydi Abdug‘ani Sanginov.
Ta’kidlanishicha, mazkur stansiya uchun zaruriy texnologik qurilmalar Xitoyning yetakchi kompaniyasi Dongfang Elektric International Corporation tomonidan yetkazib berilgan.
Bunyod etish jarayonida gidroturbinaning spiralsimon kamera qismini yig‘ish, bosimli hovuz, bosimli suv quvurini qurish va boshqa bir qator ishlar amalga oshirilgan.
Ta’kidlanishicha, ushbu investitsiyaviy loyiha “To‘palang GES”, “Zarchob-1” GESlarining davomi hisoblanib, To‘palang suv omboridan chiquvchi suv o‘zanida qurilgan. Kelgusida Surxondaryo viloyati aholisining elektr energiyaga bo‘lgan 80 foiz ehtiyojini qoplash reja qilingan.
2021-yilning aprel oyida umumiy quvvati 37,4 megavattga teng bo‘lgan “Zarchob-1” kichik GESi qurib, foydalanishga topshirilgan edi.
Tadbirdan so‘ng, ramziy tugmani bosish marosimi bo‘lib o‘tgan. Abdug‘ani Sanginov viloyat hokimi To‘ra Bobolov va viloyat prokurori Sadriddin Turdiyevni GES faoliyati bilan tanishtirar ekan, stansiya ishini “ekologik toza” deya atagan.
Avvalroq Surxondaryoda aholini toza ichimlik suvi bilan ta’minlaydigan yirik loyihani boshlashga start berilgani, O‘zbekiston va Tojikiston “50/50” tamoyili asosida 552 million dollarlik ikkita gidroelektrostansiya qurishi to‘g‘risida xabar berilgandi.
Izoh (0)