20 ноябрь куни Сурхондарё вилояти Сариосиё туманида «Зарчоб-2» кичик гидроэлектр станциясини ишга туширишга бағишланган маросим бўлиб ўтди. Бу ҳақда вилоят ҳокимлиги матбуот хизмати хабар берди.
Маълум қилинишича, тантанали маросимда вилоят ҳокими Тўра Боболов, «Ўзбекгидроэнерго» АЖ раиси, сенатор Абдуғани Сангинов, вилоят ҳокими ўринбосарлари, туманлар ҳокимлари, соҳа мутахассислари, оммавий ахборот воситалари вакиллари, нуронийлар ҳамда кенг жамоатчилик вакиллари иштирок этган.
38,2 мегаваттли мазкур станция тўлиқ қувватда ишлаши ортидан 40 минг аҳоли хонадонини электр энергия билан таъминлаш имконияти яратилади. «Зарчоб-1» ГЭС ҳам худди шундай салоҳиятга эга.
«Gazeta.uz»нинг ёзишича, очилиш маросими олдидан сўзга чиққан вилоят ҳокими Тўра Боболов лойиҳанинг аҳамиятига тўхталиб ўтган.
«Тўпалангдан келаётган сувдан 3 маротаба фойдаланиб, ток ишлаб чиқаряпмиз. Сурхондарёга совуқ келганига 3-4 кун бўлди. Эрталаблари фуқароларни қабул қиляпмиз, (улар — таҳр.) биринчи масала электр энергия деб келяпти… Ўзбекистон мустақил электр энергия ишлаб чиқаришни йўлга қўймаса, барибир (муаммолар бўлаверади). Бу лойиҳалар — келажагимиз», — дейди ҳоким.
«Тўпаланг дарёсида 2006 йилда бор-йўғи 30 МВт энергия бор эди. Бугунги кунга келиб, 350 мегаваттга етадиган лойиҳаларимиз бор. 2 та ‘Зарчоб’нинг ўзи жами 75 МВт энергия ишлаб чиқаради. 2022 йилга келиб, 175 мегаваттлик ‘Тўпаланғ ГЭС ишга туширилади. Ундан кейинги лойиҳамиз Мизоп-Киштут станцияси. Унинг биттаси 50 мегаваттлик, иккинчиси 25 мегаваттлик, жами 75 мегаватт электр энергия чиқади. Шунинг учун, Тўра Абдиевич айтганидек, 3 маротаба эмас, 5 маротаба сувни айлантириб, электр энергия олишга эришамиз», — дейди Абдуғани Сангинов.
Таъкидланишича, мазкур станция учун зарурий технологик қурилмалар Хитойнинг етакчи компанияси Dongfang Elektric International Corporation томонидан етказиб берилган.
Бунёд этиш жараёнида гидротурбинанинг спиралсимон камера қисмини йиғиш, босимли ҳовуз, босимли сув қувурини қуриш ва бошқа бир қатор ишлар амалга оширилган.
Таъкидланишича, ушбу инвестициявий лойиҳа «Тўпаланг ГЭС», «Зарчоб-1» ГЭСларининг давоми ҳисобланиб, Тўпаланг сув омборидан чиқувчи сув ўзанида қурилган. Келгусида Сурхондарё вилояти аҳолисининг электр энергияга бўлган 80 фоиз эҳтиёжини қоплаш режа қилинган.
2021 йилнинг апрель ойида умумий қуввати 37,4 мегаваттга тенг бўлган «Зарчоб-1» кичик ГЭСи қуриб, фойдаланишга топширилган эди.
Тадбирдан сўнг, рамзий тугмани босиш маросими бўлиб ўтган. Абдуғани Сангинов вилоят ҳокими Тўра Боболов ва вилоят прокурори Садриддин Турдиевни ГЭС фаолияти билан таништирар экан, станция ишини «экологик тоза» дея атаган.
Аввалроқ Сурхондарёда аҳолини тоза ичимлик суви билан таъминлайдиган йирик лойиҳани бошлашга старт берилгани, Ўзбекистон ва Тожикистон «50/50» тамойили асосида 552 миллион долларлик иккита гидроэлектростанция қуриши тўғрисида хабар берилганди.
Изоҳ (0)