Toshkent shahar IIBB ijtimoiy tarmoqlarda tarqalgan hayvonlarga nisbatan shafqatsizlik qilgan yigit videosi yuzasidan ma’lumot berib, ushbu fuqaroning shaxsi aniqlanganini ma’lum qildi.
Ijtimoiy tarmoqlarda noma’lum shaxs Toshkentning Yashnobod tumanida mushuklarni qiynagani va o‘ldirgani tasvirlangan videolar tarqaldi. E’lon qilingan kadrlardan ko‘rish mumkinki, yaxshi kiyinib olgan 16—20 yosh atrofidagi yigit mushuklarni paket yordamida aldab ushlagan va ularni podyezdga olib kirib, qiynagan. 40 daqiqa ichida u beshta mushukni qiynagan va ularning birini o‘ldirgan.
Ta’kidlanishicha, mazkur holat 16-noyabr kuni taxminan soat 15:00 da Yashnobod tumanida kuzatuv kameralari orqali qayd etilgan.
Poytaxt IIBB matbuot xizmatining ma’lum qilishicha, videodagi yigit — 20 yoshli I.А. ekani ma’lum bo‘lgan. Yigit Yashnobod tumani IIO FMB 1-son ichki ishlar bo‘limiga yetkazilgan, suhbat davomida u qilmishiga iqror bo‘lgan. Hozirgi vaqtda mazkur fakt bo‘yicha tergov oldi tekshiruvi o‘tkazilmoqda, uning natijalariga ko‘ra qonuniy chora ko‘riladi.
Bundan avval Toshkent viloyatida itlar so‘yib sotilayotgani to‘g‘risidagi xabar o‘z tasdig‘ini topmagani, Namanganda itni daraxtga osgan bolalarning ota-onalari va uni videoga olib tarqatgan bolalar jarimaga tortilgani hamda Olmaliqda itni mayib qilgan uysiz hayvonlarni ushlash xizmati xodimiga 122 ming so‘m jarima solingani haqida xabar berilgandi.
Izoh (0)