Toshkent viloyatining Bekobod tumanida o‘z og‘lini bolta bilan bir necha bor urib, o‘ldirgan otaga sud hukmi o‘qildi. Bu haqda “Sevimli” telekanalining “Zamon” informatsion dasturida ma’lum qilindi.
Ma’lum qilinishicha, tumanning Zafar shaharchasi ota o‘z o‘g‘lini 25 marotaba bolta bilan chopgan. Qotillikni sodir etgan ota jinoyat ishlari bo‘yicha Bekobod tumani sudi raisiga iltimosnoma yozib, ochiq sud majlisida OAV xodimlari qatnashishini so‘ragan.
“Men kim edim? Qaysi oiladan kelib chiqdim? Hozirgi kunda kimman? Hozirda qotilman, aybimga iqrorman. Kelajak avlodga o‘rnak bo‘lsin. Mana 5,5 oy hibsxonalarda yotib keldim, kelajak avlodga o‘tmasligi uchun iltimos qilaman”, — deydi qotil ota.
Fuqaro F.Y.ga Jinoyat kodeksining 95-moddasi (tibbiy yo‘sindagi majburlov choralarini qo‘llashni uzaytirish, o‘zgartirish va tugatish) bilan jinoyat ishi qo‘zg‘atilgan. U oliy ma’lumotli, to‘rt nafar farzandi bor. Suiqasd qilingan kenja o‘g‘li, marhum I.Y.ning ham oilasi va uch nafar farzandi bo‘lgan.
Ma’lum bo‘lishicha, I.Y. YPX xodimi sifatida 9 yildan ko‘proq faoliyat yuritgan, ishidagi xato va kamchiliklar tufayli to‘satdan vazifasidan ozod etilgan. Ishga tiklash borasidagi murojaatlari qanoatlantirilmagach, bekorchilikdan spirtli ichimliklarga ruju qo‘ygan. Mast holatda bo‘lganida oila a’zolariga tazyiq o‘tkazib kelgan.
2021-yil 7-iyun kuni ko‘tarilgan janjalda o‘g‘il otasidan pul talab qilgan. Otasi yostig‘ining tagida saqlanayotgan 1,2 million pensiya puli borligini aytgan, ammo o‘g‘il ko‘p pul kerakligini ta’kidlagan.
“Kampirimning xonasiga kirsam, divanning ustida o‘tiribdi, kampirim seyfni ochib bergan... Ko‘zim boltaga tushdi, uni qaysi tomoni bilan urganman, necha marta urganman, nima qilganimni bilmayman”, — deydi ota.
Fuqaro F.Y. marhum o‘g‘lining qiliqlaridan bezor bo‘lib, hatto to‘rt marotaba o‘z joniga qasd qilganini aytgan. Ammo sudda guvoh sifatida ishtirok etgan uning yaqinlari bu haqda so‘z ochmagan.
Ta’kidlanishicha, o‘sha kuni janjal boshlangan vaqtda marhumning turmush o‘rtog‘i IIBga murojaat qilgan. Biroq ota-ona farzandining mahalla oldida boshi egilmasligi uchun mojaroni o‘zimiz hal qilamiz deb, xodimni qaytarib yuborgan.
Sud hukmiga ko‘ra fuqaro F.Y.ga 12 yil ozodlikdan mahrum qilish jazosi tayinlangan, jazo muddatini umumiy tartibli kaloniyalarda o‘tash belgilangan.
Avvalroq Toshkentda 20 yoshli o‘g‘lini o‘ldirib, uni yerto‘laga ko‘mib qo‘ygan erkakka sud hukmi o‘qilgani, buxorolik ota o‘z o‘g‘lini pichoqlab qo‘ygani to‘g‘risida xabar berilgandi.
Izoh (0)