Buxoro viloyati Kogon shahrida tuproq o‘pirilishi oqibatida 2 kishi halok bo‘lgani to‘g‘risida xabar berilgandi. Bandlik va mehnat munosabatlari vazirligi yuz bergan mazkur holatga rasmiy munosabat bildirib, komissiya baxtsiz hodisa sabablarini o‘rganayotganini ma’lum qildi.
16-noyabr kuni soat 14:50 da Kogon shahar “Do‘stlik” MFY Do‘stlik ko‘chasida “61-avtokorxona” MChJ tomonidan yer 5-6 metr chuqurlikda, eni 3 metr oralig‘ida kovlangan holda 1000 millimetrli suv quvurlari yotqizilayotgan vaqtda chuqurning chap tomoni o‘pirilib, ikki nafar ishchini tuproq va qum bosib qolgan. Viloyat Favqulodda vaziyatlar boshqarmasi qutqaruvchilari tomonidan voqea joyida olib borilgan tezkor qidiruv ishlari natijasida ikki nafar fuqaroning jasadi tuproq ostidan olib chiqilgan.
Ushbu holat yuzasidan Buxoro viloyati Bandlik bosh boshqarmasining 18-noyabrdagi “Ishlab chiqarishdagi baxtsiz hodisani maxsus tekshirish to‘g‘risida”gi 202-ICh-sonli buyrug‘i qabul qilingan. Ta’kidlanishicha, ayni paytda buyruqqa asosan tuzilgan komissiya ro‘y bergan hodisa sabablarini o‘rganmoqda. “Uning yakuniga ko‘ra qo‘shimcha ma’lumot beriladi”, — deyiladi munosabatda.
Avvalroq Buxoro viloyati IBB holat yuzasidan jinoyat ishi qo‘zg‘atilganini ma’lum qilgandi.
“Quvurlar yotqizish jarayonida esa ular ustining yarmi qum bilan to‘ldirilib, so‘ng tuproq bilan yopiladi. Xuddi shu jarayonda ishchini qum yoki tuproq bosib qo‘ymasligi uchun mustahkam yog‘och ‘shit’lar o‘rnatiladi, ushbu shitlar himoya vazifasini bajaradi. Biroq yuqoridagi holat chog‘ida chuqurlikda himoyalanish uchun ‘shit’ o‘rnatayotgan yosh ishchilar muvozanatni yo‘qotishgan va ‘shit’ oldinga siljib ketgan. O‘ra yuqorisida pastdagi ikki nafar yigit bilan ishlab turgan yigitlar ham kutilmaganda sodir bo‘lgan o‘pirilish oqibatida ularga ko‘mak bera olmagan. Ikki yosh ishchi qum va tuproq ostida qolib ketgan”, — degandi viloyat “Suvoqava” rahbari o‘rinbosari Baxtiyor Nazarov.
Izoh (0)