Davron Hidoyatov Shavkat Mirziyoyev farmoniga binoan Chirchiq shahri hokimi etib tayinlangani to‘g‘risida xabar berilgandi. Toshkent viloyati hokimligi axborot xizmatining ma’lum qilishicha, shaharning sobiq hokimi o‘z arizasiga ko‘ra lavozimdan ozod etilgan.
Ma’lum qilinishicha, 18-noyabr kuni Chirchiq shahar hokimligida faollar yig‘ilishi bo‘lib o‘tgan. Yig‘ilishda Prezident Administratsiyasi rahbari Zaynilobiddin Nizomiddinov ishtirok etgan. Shuningdek, Chirchiq shahar hokimining o‘rinbosarlari, sektor rahbarlari, xalq deputatlari Chirchiq shahar Kengashi deputatlari, shahardagi tashkilot va idoralar boshliqlari qatnashgan.
Yig‘ilishda tashkiliy masala ko‘rib chiqilib, Chirchiq shahar hokimi Sanjar Yusupov o‘z arizasiga ko‘ra lavozimidan ozod etilgan.
Ayni paytga qadar Toshkent viloyati hokimi lavozimida faoliyat yuritib kelgan Davron Hidoyatov Chirchiq shahrining yangi hokimi sifatida faollarga tanishtirilgan. Avvalroq Toshkent viloyati hokimi lavozimiga Zoir Mirzayev tayinlangan edi.
Eslatib o‘tamiz, Sanjar Yusupov 2020-yilning fevralidan buyon Chirchiq shahar hokimi lavozimida ishlab kelayotgandi. Yusupov mehnat faoliyati davomida Toshkent traktor zavodi, “O‘zbekiston temir yo‘llari” kompaniyasida mas’ul vazifalarda faoliyat olib borgan. U 2018-2020-yillarda Toshkent viloyati hokimining kapital qurilish va kommunikatsiyalar masalalari bo‘yicha o‘rinbosari bo‘lgan.
Izoh (0)