Тошкент вилоятининг Бекобод туманида ўз оғлини болта билан бир неча бор уриб, ўлдирган отага суд ҳукми ўқилди. Бу ҳақда «Севимли» телеканалининг «Замон» информацион дастурида маълум қилинди.
Маълум қилинишича, туманнинг Зафар шаҳарчаси ота ўз ўғлини 25 маротаба болта билан чопган. Қотилликни содир этган ота жиноят ишлари бўйича Бекобод тумани суди раисига илтимоснома ёзиб, очиқ суд мажлисида ОАВ ходимлари қатнашишини сўраган.
«Мен ким эдим? Қайси оиладан келиб чиқдим? Ҳозирги кунда кимман? Ҳозирда қотилман, айбимга иқрорман. Келажак авлодга ўрнак бўлсин. Мана 5,5 ой ҳибсхоналарда ётиб келдим, келажак авлодга ўтмаслиги учун илтимос қиламан», — дейди қотил ота.
Фуқаро Ф.Й.га Жиноят кодексининг 95-моддаси (тиббий йўсиндаги мажбурлов чораларини қўллашни узайтириш, ўзгартириш ва тугатиш) билан жиноят иши қўзғатилган. У олий маълумотли, тўрт нафар фарзанди бор. Суиқасд қилинган кенжа ўғли, марҳум И.Й.нинг ҳам оиласи ва уч нафар фарзанди бўлган.
Маълум бўлишича, И.Й. ЙПХ ходими сифатида 9 йилдан кўпроқ фаолият юритган, ишидаги хато ва камчиликлар туфайли тўсатдан вазифасидан озод этилган. Ишга тиклаш борасидаги мурожаатлари қаноатлантирилмагач, бекорчиликдан спиртли ичимликларга ружу қўйган. Маст ҳолатда бўлганида оила аъзоларига тазйиқ ўтказиб келган.
2021 йил 7 июнь куни кўтарилган жанжалда ўғил отасидан пул талаб қилган. Отаси ёстиғининг тагида сақланаётган 1,2 миллион пенсия пули борлигини айтган, аммо ўғил кўп пул кераклигини таъкидлаган.
«Кампиримнинг хонасига кирсам, диваннинг устида ўтирибди, кампирим сейфни очиб берган... Кўзим болтага тушди, уни қайси томони билан урганман, неча марта урганман, нима қилганимни билмайман», — дейди ота.
Фуқаро Ф.Й. марҳум ўғлининг қилиқларидан безор бўлиб, ҳатто тўрт маротаба ўз жонига қасд қилганини айтган. Аммо судда гувоҳ сифатида иштирок этган унинг яқинлари бу ҳақда сўз очмаган.
Таъкидланишича, ўша куни жанжал бошланган вақтда марҳумнинг турмуш ўртоғи ИИБга мурожаат қилган. Бироқ ота-она фарзандининг маҳалла олдида боши эгилмаслиги учун можарони ўзимиз ҳал қиламиз деб, ходимни қайтариб юборган.
Суд ҳукмига кўра фуқаро Ф.Й.га 12 йил озодликдан маҳрум қилиш жазоси тайинланган, жазо муддатини умумий тартибли калонияларда ўташ белгиланган.
Аввалроқ Тошкентда 20 ёшли ўғлини ўлдириб, уни ертўлага кўмиб қўйган эркакка суд ҳукми ўқилгани, бухоролик ота ўз ўғлини пичоқлаб қўйгани тўғрисида хабар берилганди.
Изоҳ (0)