Gruziyaning sobiq prezidenti Mixail Saakashvili qamoqxona kasalxonasidan Gori shahridagi harbiy gospitalga o‘tkaziladi. Bu haqda mamlakat adliya vaziri Rati Bregadze brifingda ma’lum qildi, deb yozadi “Interfaks”.
“Biz mahbus Saakashvilini Gori shahridagi harbiy gospitalga yotqizishni taklif qilyapmiz. U yer uning salomatligi va xavfsizligi davlat tomonidan maksimal darajada himoya qilinadigan joy. Bu qaror bilan biz nafaqat Mixail Saakashvilining, balki boshqa ko‘plab insonlarning salomatligi va hayotini muhofaza qilamiz”, — dedi vazir.
Uning qayd etishicha, davolanish kursi tugaganidan keyin Saakashvili Rustavi qamoqxonasiga o‘tkaziladi.
“Shuni aniq qilib bildirishni istardikki, muxoliflar mahbusni ko‘chirishga, so‘ng tibbiyot xodimlarining ishiga xalaqit berishi mumkin bo‘lgan birorta provokatsiya sodir etsa, Saakashvili qamoqxona kasalxonasiga qaytariladi va har qanday huquqbuzar qonun oldida qat’iy javobgarlikka tortiladi”, — dedi Bregadze.
49 kundan beri ochlik saqlab kelayotgan Saakashvili advokati bilan uchrashuv vaqtida yiqilib tushib, hushidan ketgani haqida xabar berilgandi. Yiqilgach, u ko‘zini ochmagan va hech narsani sezmagan. Saakashvilini “nosilka”da olib ketishgan. U qamoqxona shifoxonasining jonlantirish bo‘limiga yotqizilgan.
Avvalroq Saakashvilining shaxsiy shifokori Nikoloz Kipshidze Gruziya sobiq prezidentining ahvoli keskin yomonlashganini ma’lum qilgandi. Shifokorning so‘zlariga ko‘ra, organizmdagi endokrinologik va metabolik o‘zgarishlar natijasida yuzaga kelgan teri sarg‘ayishi avvalgi kunlarga nisbatan kuchaygan. Doktor Kipshidze yaqin kunlarda bu o‘zgarishlar tuzatib bo‘lmas holga kelishidan xavotirda edi.
Izoh (0)