Tirik jon bir kun o‘lishi tayin. Kimdir o‘zining yo boshqaning aynan qachon va qay ahvolda bu dunyoni tark etishini aniq aytib berolmaydi. Lekin ayrim adabiyot vakillari yozgan she’rlarida go‘yo o‘z o‘limini bashorat qilayotganday taassurot uyg‘otadi. “Daryo” shu kabi ayrim rus shoirlari haqida hikoya qiladi.
Buyuk rus shoiri Mixail Lermontov “Tush” nomli she’rida Dog‘iston o‘lkasida ko‘ksiga qadalgan o‘qdan o‘lib yotgani haqida yozadi. Haqiqatan u Shimoliy Kavkaz federal okrugi hududidagi Pyatigorsk shahrida Nikolay Martinov bilan bo‘lib o‘tgan duelda ko‘ksidan yaralanib, halok bo‘lgan.
Adabiyot bo‘yicha Nobel mukofoti sohibi Iosif Brodskiy bir she’rida o‘lim haqida so‘z ochib: “XX asr tez orada tugaydi, lekin ungacha men tamom bo‘laman”, —deydi. Shoir chindan ham XXI asrni ko‘rmay, 1996-yilda vafot etgan.
Rus klassik she’riyati vakillari Sergey Yesenin va Marina Svetayevalarning o‘limi o‘z joniga qasd qilish emas, balki uyushtirilgan qotillik bo‘lgani haqida gaplar yuradi. Bu qanchalik haqiqatga yaqinligi noma’lum, biroq Svetayeva o‘z she’rida jazirama yoz kunlaridan birida o‘lim parishon qo‘llari bilan meni boshimdan judo qiladi, deya qilgan bashorati to‘g‘ri chiqqan. Shoira 1941-yil yozining so‘nggi kuni — 31-avgustda halok bo‘lgan.
Yana bir rus shoiri Andrey Beliy “Do‘stlarimga” nomli she’rida: “Oltin jilosiga ishondim, lekin quyosh o‘qidan o‘ldim”, — deydi. U chindan ham quyosh urishi natijasida insultga chalinib, vafot etgan.
Fyodor Sologub o‘limidan o‘n to‘rt yil avval yozgan she’rida har yili dekabrda tobi qochishini va qaysidir dekabrda o‘lim uni mahv etishini yozadi. U 1925-yil 5-dekabrda dunyodan ko‘z yumgan.
Rus she’riyatining yana bir iqtidorli vakili Nikolay Rubsov bir she’rida qishning chillasida vafot etishini aytadi. Aytgani o‘ngidan kelib, 19-yanvarda, qish chillasida o‘z qallig‘i Lyudmila Derbina tomonidan bo‘g‘ib o‘ldirilgan.
Nikolay Gumilyov “Men va siz” nomli she’rida: “Men to‘shakda, notarius va vrach qarshisida emas, balki bir ovloq joyda, qalin pechaklar orasida o‘laman”, — deydi. Aytganiday, shoir Peterburg yaqinidagi o‘rmonda otib o‘ldirilgan.
Ko‘p qirrali ijodkor Yuriy Vizbor o‘zining “O‘tganlar xotirasiga” nomli she’rida yuz yil yashagisi kelayotganini aytib, hech bo‘lmasa, uning yarmini yashab o‘tishni orzu qiladi. Buni qarangki, orzusining yarmi amalga oshib, 1985-yilda, 50 yoshida vafot etadi.
Vladimir Visotskiy “Jimlik bilan so‘zlashaman” nomli so‘nggi she’rlaridan birida hayotni alifboga qiyoslab, oxirgi harflarga yetib kelganini va kelayotgan yozda bu olamni tark etishini aytadi. Bashorati, afsuski, to‘g‘ri chiqib, 1985-yilning 25-iyul kuni vafot etadi.
Izoh (0)