Berdimuhamedov Axal viloyatida ikkinchi to‘qimachilik majmuasini ochib berdi (foto)

Turkmaniston prezidenti Gurbanguli Berdimuhamedov 17-noyabr kuni Axal viloyatining Bobodayxon etrapidagi to‘qimachilik majmuasini tantanali ravishda ochib berdi.

Turkmaniston rahbari majmuaga vertolyotda yetib keldi. U yerda prezidentni To‘qimachilik sanoati vazirligining “Dokmaçylar” madaniyat markazi ansambli kutib oldi, undan so‘ng Berdimuhamedov Turkmaniston xalq artisti Jemal Saparova bilan suhbatlashdi.

So‘ng davlat rahbari binoga kirib bordi va u yerda yig‘ilganlar oldida nutq so‘zladi. “Asosiy maqsadimiz – mamlakatimizni sanoati rivojlangan, jahonning ilg‘or davlatlari qatoriga olib chiqish, xalqning ijtimoiy va turmush darajasini sezilarli darajada oshirishdir”, – dedi prezident.

151,8 million dollarlik majmua 20 gektar maydonni egallagan. U ma’muriy bino, sanoat omborlari, ustaxona, 450 o‘rinli oshxona, sport maydonchasi va 16 o‘rinli ikkita mehmonxonani o‘z ichiga oladi.

Majmua yiliga 5 ming tonna nozik tolali paxtani qayta ishlash va yiliga 3 300 tonna ip-kalava, 20 million kvadrat metr turli gazlamalar, jumladan, 18 million metr bo‘yalgan mato va 3,5 million dona tayyor kiyim-kechak ishlab chiqarishga mo‘ljallangan.

“Import o‘rnini bosishga mo‘ljallangan yangi korxonada ishlab chiqarilayotgan mahsulotlar katta mablag‘ni tejab, ortiqcha tayyor mahsulotlarni boshqa mamlakatlarga yetkazib berish uchun zamin yaratadi”, — dedi Gurbanguli Berdimuhamedov va majmua foydalanishga topshirilishi bilan 1150 ish o‘rni yaratilishini qo‘shimcha qildi.

So‘ngra yig‘ilganlarga Rieter Management AG (Shveysariya) ishbilarmon doiralari rahbari Rojer Albrextning korxona ochilishi munosabati bilan prezidentga tabrigi aks etgan videoyozuv namoyish etildi. Kompaniya majmuaga ip-kalava qadoqlash uskunasini o‘rnatgan va Turkmaniston tomoniga tegishli sertifikat taqdim etgan. Picanol kompaniyasining (Belgiya) direktori, Rieter (Shveysariya) kompaniyasining aksiyadori Lyuk Tak ham videomurojaat yo‘llab, ular 110 ta to‘quv dastgohini o‘rnatib berganini ma’lum qildi va tegishli sertifikatni taqdim etdi.

Davlat rahbari ma’ruzalardan so‘ng majmuani tantanali ravishda ochib, “maxsus avtotransport”da yigiruv fabrikasiga yetib bordi. U yerda sexlar ishini ko‘zdan kechirdi, ishchilar bilan suhbatlashdi.

Telereportajdan olingan kadrlarga qaraganda, “maxsus transport” Qozog‘iston prezidenti Qosim-Jo‘mart To‘qayev 2021-yilning 26-oktabr kuni Ashxobodga tashrifi chog‘ida Berdimuhamedovga sovg‘a qilgan mikroavtobusdir. Bu haqda Turkmaniston davlat axborot agentligi materialida qayd etilmagan.

U yerda Gurbanguli Berdimuhamedovga fabrika faoliyati haqida gapirib berildi, so‘ng fabrikada ishlab chiqariladigan to‘qimachilik mahsulotlari ko‘rsatildi. Tadbir yakunida prezident korxona jamoasiga yangi avtobus, yengil va yuk avtomobillari kalitlarini topshirdi.

Eslatib o‘tamiz, 25-avgust kuni Berdimuhamedov Axal vilyotining Kaaxki etrapida 1300 ish o‘ringa mo‘ljallangan qiymati 147 million 850 ming dollarlik to‘qimachilik majmuasini ochib bergandi.