Oktabr oyida Suriya janubidagi Amerika bazasiga dronlar yordamida uyushtirilgan hujum Eronning Suriya bo‘ylab Isroil tomonidan amalga oshirilgan aviazarbalariga javob tarzida amalga oshirilgan. Bu haqda The New York Times’ga tayanib, “Interfaks” xabar berdi.
Nashrning yozishicha, 20-oktabr kuni Suriya janubidagi Amerikaning “At-Tanf” harbiy bazasi tomon beshta uchuvchisiz boshqariladigan uchish apparati uchirilgan. AQSh Markaziy qo‘mondonligi buni “qasddan va koordinatsiyalashgan” hujum deb atagan. AQShning yuqori martabali harbiy amaldori gazetaga bergan intervyusida “aniq o‘ldirish niyatida” bo‘lgan dronlarning faqat ikkitasi portlaganini ma’lum qilgan.
Hujum oqibatida hech kimga jarohat yetmagan, chunki bazadagi 200 ga yaqin xodim Isroil razvedkasining hujumga tayyorgarlik ko‘rilayotgani bo‘yicha bergan ma’lumotlari asosida evakuatsiya qilingan edi.
NYT’ning qayd etishicha, hujum Eron boshchiligida Suriyadagi kuchlar tomonidan amalga oshirilgan, biroq Pentagon vakili “29-noyabr kuni o‘tkaziladigan Tehronning yadroviy bitimga qaytishi borasidagi muzokaralar barbod bo‘lmasligi uchun Eronni ommaviy ayblashdan bosh tortgan”.
Eron ushbu hujum bo‘yicha mas’uliyatni zimmasiga olmagan. “Ular hech qanday dalil va hujjatsiz Eronni ayblagan shunga o‘xshash bir qancha voqealar bo‘lgan”, — degan edi Eron TIV vakili Said Xatibzoda.
Shu bilan birga, nashr manbasining ta’kidlashicha, AQSh va Isroil operatsiya ortida Eron turganini ko‘rsatuvchi razvedka ma’lumotlariga ega. Uchta uchuvchisiz boshqariladigan uchish apparati portlamagani sabab amerikaliklar uni o‘rgangan va ularda Eron tomonidan Iroqda qo‘llab-quvvatlanadigan jangarilar qo‘llovchi dronlardagi texnologiyadan foydalanilganini aniqlagan.
Nashrning qayd etishicha, “Eronning Isroil bilan yashirin urushining kuchayishi Yaqin Sharqdagi Amerika qo‘shinlari uchun yangi xavflarni keltirib chiqarmoqda”.
Avvalroq Eron Fors ko‘rfazida harbiy mashg‘ulotlar boshlagani, Jo Bayden Eronga qarshi 1979-yilda joriy etilgan sanksiyalarni uzaytirgani to‘g‘risida xabar berilgandi.
Izoh (0)