Tehron AQShning 18-noyabr kuni Eronga qarshi joriy qilgan yangi sanksiyalarini qoralaydi. Bu haqda Eron Tashqi ishlar vazirligi rasmiy vakili Said Xatibzodaga tayanib, “TASS” xabar berdi.
“Eron AQShning yangi sanksiyalarini maksimal bosim o‘tkazish bo‘yicha (AQSh sobiq prezidenti) Donald Tramp olib borgan muvaffaqiyatsiz siyosatning davomi deb biladi, ularni qoralaydi va bu harakatni noqonuniy deb biladi”, — deya uning so‘zlarini keltirgan TIV matbuot xizmati.
18-noyabr kuni AQSh Eronning Emennet Pasargad kiberkompaniyasi va uning olti nafar xodimiga sanksiyalar kiritgandi. Vashington nazdida ular 2020-yilda bo‘lib o‘tgan AQSh prezidentlik saylovlariga ta’sir o‘tkazishga uringan.
Avvalroq AQSh prezidenti Jo Bayden Eron neftiga qarshi Amerika sanksiyalari saqlanib qolishini tasdiqlagan edi. Uning so‘zlariga ko‘ra, Tehrondan neft xarid qilmaslik uchun dunyoda yetarlicha zaxira mavjud.
Eslatib o‘tamiz, 2021-yil apreldan iyungacha Eron va yana bir nechta dunyo yetakchi davlatlari Venada Yadro dasturi bo‘yicha xalqaro kelishuv rejasiga qaytish yuzasidan olti raundlik muzokaralarni o‘tkazgan. Ayni vaqtda muzokaralar jarayonida tanaffus e’lon qilingan.
“Birgalikdagi harakatlar rejasi” deb nomlanadigan kelishuv 2015-yil yozida Tehron hamda beshta vositachi mamlakat o‘rtasida imzolangan. Keyinchalik Eronning mazkur kelishuvni qo‘pol ravishda buzganlikda ayblashgan. 2018-yil may oyi boshida AQSh kelishuvdan bir tomonlama chiqishini e’lon qilgan va Eronga qarshi sanksiyalar qayta joriy qilinganini bildirdi. Eron esa kelishuv shartlariga ortiq rioya qilmasligi va 2020-yil yanvardan mazkur shartnomadan to‘liq chiqqanini qayd etgandi.
Izoh (0)