Bugun,

  • USD 11095.31
  • RUB 173.84
  • EUR 10772.44

Gruziyaning hibsda saqlanayotgan sobiq prezidenti Mixail Saakashvilining sog‘lig‘i 48 kunlik ochlikdan so‘ng keskin yomonlashgan, jumladan, unda teri sarg‘ayishi va letargiya alomatlari mavjud. Bu haqda Saakashvilining shaxsiy shifokori Nikoloz Kipshidze jurnalistlarga ma’lum qildi.

Foto: Flikcr.com

Foto: Flikcr.com

Kipshidze sobiq prezident 2-oktabr kuni “o‘limga olib keluvchi ochlik” (ya’ni u komaga tushib qolgan taqdirda ham qamoqxona shifokorlariga uni o‘ziga keltirishni taqiqlagan) boshlanganini e’lon qilganidan so‘ng, atayin AQShdan vataniga qaytgandi.

Shifokorning so‘zlariga ko‘ra, organizmdagi endokrinologik va metabolik o‘zgarishlar natijasida yuzaga kelgan teri sarg‘ayishi avvalgi kunlarga nisbatan kuchaygan. Doktor Kipshidze yaqin kunlarda bu o‘zgarishlar tuzatib bo‘lmas holga kelishidan xavotirda.

Shunisi e’tiborga loyiqki, Tbilisi chekkasidagi Gldani qamoqxonasi ma’muriyati birinchi marta shaxsiy shifokorga qamoqxona kasalxonasidagi hozir Mixail Saakashvili yotgan palataga tashrif buyurishga ruxsat berdi. Chunki Saakashvili yotoqdan turishga qiynalmoqda va mustaqil ravishda harakatlana olmayapti.

18-noyabrga o‘tar kechasi Gruziya ombudsmani Nino Lomjariyaning tashabbusi bilan yig‘ilgan shifokorlar kengashi “bemor M.Saakashvilining ochlikdan keyin tiklanish jarayonida zarur intensiv terapiya uchun uni shahar ko‘p tarmoqli shifoxonasiga o‘tkazish”ni tavsiya qildi.

Inson huquqlari bo‘yicha Yevropa sudining “ochlikni zudlik bilan to‘xtatish” bo‘yicha qat’iy tavsiyasiga qaramay, sobiq prezident shahar klinikasiga o‘tkazilgandan keyingina ovqatlana boshlashini aytgan. Hozirgacha u faqat dori-darmonlarni va ba’zi ozuqaviy qo‘shimchalar, jumladan, bolalar bo‘tqasi va choy iste’mol qilmoqda.

Shunga qaramay, Gruziya hukumati Mixail Saakashvilini qamoqxona kasalxonasida davolash fikrida qat’iy turibdi, ular agar mashhur siyosatchi shahar klinikasiga o‘tkazilsa, mahbusning xavfsizligini ta’minlash imkoni bo‘lmay qolishdan yoki o‘sha klinika “inqilob shtab-kvartirasi”ga aylanib ketishidan xavotirda. Qamoqxona devorlari ortida turib ham Mixail Saakashvili gruzinlarni hukumatni tinch va zo‘ravonliksiz almashtirishga chaqirmoqda.

Ayni paytda Ukraina ombudsmani Lyudmila Denisova bir necha kundan beri Tbilisida. U Gruziya adliya vaziri Rati Bregadze bilan Mixail Saakashvili atrofidagi vaziyatni muhokama qilish uchun uchrashuv o‘tkazishga intilmoqda. Saakashvili — Ukraina fuqarosi, u yerda Islohotlar milliy kengashi ijroiya qo‘mitasi rahbari lavozimida ishlagan.

1-oktabr kuni Mixail Saakashvili sakkiz yildan buyon birinchi marta Gruziyaga kelgandi. Kelishi bilanoq Tbilisida hibsga olingan, shundan so‘ng ochlik e’lon qilgan.

Izoh
Asosiy yangiliklar
Mahalliy
“Hududgazta’minot” aholini gazdan oqilona foydalanishga chaqirdi
Mahalliy
“Kimdir javob berishi, kimdir qusishi kerak” — faollar gaz va elektr muammosi sababchilariga jazo so‘ramoqda
Mahalliy
Toshkent viloyatida er-xotin va ularning uch oylik chaqalog‘i is gazidan vafot etdi