Rossiyalik balerina Anastasiya Volochkova QBF yirik moliyaviy piramidasi ishtirokchilari uni 1,7 million rublga (taxminan, 23 ming AQSh dollari) chuv tushirgani haqida ariza bilan Moskva politsiyasiga murojaat qildi. Bu haqda Meduza xabar berdi.
Volochkovaning “Kommersant” nashri vakiliga aytishicha, 2020-yil iyun oyida QBF vakili u bilan bog‘lanib, yiliga 10 foiz stavka evaziga kompaniyaga uch million rubl (taxminan, 41 ming dollar) investitsiya kiritishni taklif qilgan. Baza’ning yozishicha, QBF vakili Volochkovaga uning telefon raqamini “Rossiyadagi eng muvaffaqiyatli odamlarning ma’lumotlar bazasidan” topganini aytgan.
Balerina kompaniyaga bir yil muddatga ikki million rubl (25 ming dollar), keyin uch oy muddatga yana bir million rubl (13 ming dollar) sarmoya kiritgan. QBF vakillari unga bir million va depozitning foizini —150 ming rublni (2 ming dollar) qaytarib bergan. 2021-yilning avgust oyida u qolgan ikki million rublni qaytarib berishlarini kuta boshlagan, ammo bunday bo‘lmadi. Oxir-oqibat Volochkova QBF bosh direktori Stanislav Matyuxin orqali yana 500 ming rubl (6 ming dollar) qaytarilishiga erishdi.
“TASS”ning huquq-tartibot idoralaridagi manbasi Volochkova moddiy zarar 1,7 million rublga baholaganini aytgan, biroq bu summaning ichiga qanday boyliklar kirishini ochiqlamagan. Agentlik suhbatdoshining qo‘shimcha qilishicha, politsiya Volochkovaning arizasiga ko‘ra tekshiruv o‘tkazmoqda.
Aprel oyidan buyon QBF xodimlariga nisbatan katta miqdordagi firibgarlik bo‘yicha jinoiy ish tergovi olib borilmoqda. May oyida politsiya ishni tekshirgandan so‘ng, investitsion tuzilma amalda o‘z faoliyatini to‘xtatgan. Tergov ma’lumotlariga ko‘ra, omonatchilardan jami besh-yetti milliard rubl o‘g‘irlangan bo‘lishi mumkin.
Mazkur ish bo‘yicha jabrlanuvchilar rasman 500 kishi, ammo tergovchilarning so‘zlariga ko‘ra ular bundan ikki barobar ko‘p bo‘lishi mumkin. “Kommersant” QBF’ga sarmoya kiritganlar orasida “bir necha o‘nlab VIP-shaxs”lar, jumladan, ruhoniylar, generallar, vazirlar, turli tuzilmalarning direktorlari borligini xabar qilgan. Ularning ayrimlari mazkur ishda jabrlanuvchi maqomidan voz kechgan ya’ni pullariga da’vo qilmoqchi emas.
Tergov piramida sxemasi tashkilotchisi QBF moliyaviy guruhi benefitsiari — sirtdan hibsga olingan va xalqaro qidiruvga berilgan 33 yoshli Roman Shpakov ekanligini ma’lum qilgan. “Kommersant”ning yozishicha, u kompaniya ustidan tergovga birinchi shikoyatlar tushishi bilanoq mamlakatdan chiqib ketgan va hozir Birlashgan Arab Amirliklarida. Rossiyada tergovchilar QBF’ning uch xodimini hibsga olgan.
Sud qaroriga ko‘ra QBF’ga aloqador Mercedes va Porsche avtomobillari, poytaxt va Moskva viloyatidagi ko‘chmas mulklar, jumladan, Zelenograddagi savdo markazi, QBF bilan bog‘liq tashkilotlarga tegishli bo‘lgan bir nechta yopiq investitsiya fondlaridagi ulushlar xatlovga qo‘yildi. Xatlov ostiga bir milliard rubllik (13 million dollar) mol-mulk tushgan.
Izoh (0)