Россиялик балерина Анастасия Волочкова QBF йирик молиявий пирамидаси иштирокчилари уни 1,7 миллион рублга (тахминан, 23 минг АҚШ доллари) чув туширгани ҳақида ариза билан Москва полициясига мурожаат қилди. Бу ҳақда Meduza хабар берди.
Волочкованинг «Коммерсантъ» нашри вакилига айтишича, 2020 йил июнь ойида QBF вакили у билан боғланиб, йилига 10 фоиз ставка эвазига компанияга уч миллион рубль (тахминан, 41 минг доллар) инвестиция киритишни таклиф қилган. Базаънинг ёзишича, QBF вакили Волочковага унинг телефон рақамини «Россиядаги энг муваффақиятли одамларнинг маълумотлар базасидан» топганини айтган.
Балерина компанияга бир йил муддатга икки миллион рубль (25 минг доллар), кейин уч ой муддатга яна бир миллион рубль (13 минг доллар) сармоя киритган. QBF вакиллари унга бир миллион ва депозитнинг фоизини —150 минг рублни (2 минг доллар) қайтариб берган. 2021 йилнинг август ойида у қолган икки миллион рублни қайтариб беришларини кута бошлаган, аммо бундай бўлмади. Охир-оқибат Волочкова QBF бош директори Станислав Матюхин орқали яна 500 минг рубль (6 минг доллар) қайтарилишига эришди.
«ТАСС»нинг ҳуқуқ-тартибот идораларидаги манбаси Волочкова моддий зарар 1,7 миллион рублга баҳолаганини айтган, бироқ бу сумманинг ичига қандай бойликлар киришини очиқламаган. Агентлик суҳбатдошининг қўшимча қилишича, полиция Волочкованинг аризасига кўра текширув ўтказмоқда.
Апрель ойидан буён QBF ходимларига нисбатан катта миқдордаги фирибгарлик бўйича жиноий иш тергови олиб борилмоқда. Май ойида полиция ишни текширгандан сўнг, инвестицион тузилма амалда ўз фаолиятини тўхтатган. Тергов маълумотларига кўра, омонатчилардан жами беш-етти миллиард рубль ўғирланган бўлиши мумкин.
Мазкур иш бўйича жабрланувчилар расман 500 киши, аммо терговчиларнинг сўзларига кўра улар бундан икки баробар кўп бўлиши мумкин. «Коммерсантъ» QBF’га сармоя киритганлар орасида «бир неча ўнлаб VIP-шахс»лар, жумладан, руҳонийлар, генераллар, вазирлар, турли тузилмаларнинг директорлари борлигини хабар қилган. Уларнинг айримлари мазкур ишда жабрланувчи мақомидан воз кечган яъни пулларига даъво қилмоқчи эмас.
Тергов пирамида схемаси ташкилотчиси QBF молиявий гуруҳи бенефициари — сиртдан ҳибсга олинган ва халқаро қидирувга берилган 33 ёшли Роман Шпаков эканлигини маълум қилган. «Коммерсантъ»нинг ёзишича, у компания устидан терговга биринчи шикоятлар тушиши биланоқ мамлакатдан чиқиб кетган ва ҳозир Бирлашган Араб Амирликларида. Россияда терговчилар QBF’нинг уч ходимини ҳибсга олган.
Суд қарорига кўра QBF’га алоқадор Mercedes ва Porsche автомобиллари, пойтахт ва Москва вилоятидаги кўчмас мулклар, жумладан, Зеленограддаги савдо маркази, QBF билан боғлиқ ташкилотларга тегишли бўлган бир нечта ёпиқ инвестиция фондларидаги улушлар хатловга қўйилди. Хатлов остига бир миллиард рубллик (13 миллион доллар) мол-мулк тушган.
Изоҳ (0)