Avstriyada 22-noyabrdan lokdaun joriy etiladi, deb e’lon qildi mamlakat kansleri Aleksandr Shallenberg va sog‘liqni saqlash vaziri Volfgang Myukshteyn.
Der Standard nashrining yozishicha, butun mamlakat bo‘ylab hukm suradigan lokdaun 20 kunga e’lon qilinadi, ammo 10 kundan keyin cheklov choralari qayta ko‘rib chiqilishi mumkin. Lokdaun olib tashlangandan so‘ng ham mamlakatning emlanmagan aholisi uchun cheklovlar o‘z kuchida qoladi.
Lokdaun paytida Avstriya bo‘ylab sport, madaniy va ko‘ngilochar tadbirlar bekor qilinadi, kafelar, restoranlar va do‘konlar yopiladi. Kundalik zarur mahsulotlarni sotadiganlar bundan mustasno. Shuningdek, lokdaun paytida maktablarda oflayn darslar bekor qilinadi.
Kompaniyalarga o‘z xodimlarini masofadan ishlashga o‘tkazish tavsiya etiladi va yopiq joylarda, shu jumladan, ish joyida yuqori himoyalangan FFP2 turdagi niqoblarni taqish majburiy qilinadi.
Avstriya hukumati, shuningdek, koronavirusga qarshi majburiy vaksinatsiya uchun qonunchilik bazasini tayyorlayotganini e’lon qildi. U 1-fevraldan joriy etilishi kutilmoqda.
Vektorli vaksinalarning ikki komponenti bilan emlanish kursini allaqachon tugatganlar uchun to‘rt oydan keyin buster (kuchaytiruvchi) doza tavsiya etiladi. mRNK vaksinalari bilan emlanganlar ham to‘rt oydan keyin buster dozani olishi mumkin. 1-yanvardan boshlab COVID sertifikatining amal qilish muddati uchinchi dozadan keyin yetti oygacha qisqartiriladi.
Iqtisodiyot vaziri Margaret Shrambok lokdaunga izoh berar ekan, Avstriya vaksinatsiya darajasi bo‘yicha qo‘shni davlatlardan ortda qolayotgani uchun mamlakat aholisi uyalishi kerakligini aytdi.
Jons Hopkins universiteti ma’lumotlariga ko‘ra, Avstriyada o‘tgan sutka davomida 15 145 kishida koronavirus aniqlangan, pandemiya boshlanganidan beri mamlakatda jami 1 011 465 kishi infeksiyaga chalingan. Avstriyaning aholisi 8,9 million kishini tashkil etadi.
Bundan avval Avstriyada COVID-19 ga qarshi emlanganlik to‘g‘risidagi sertifikat yoki so‘nggi 180 kun ichida kasallikdan tuzalganini tasdiqlovchi hujjati yo‘q 12 yoshdan kattalar uchun lokdaun e’lon qilingandi. Cheklovlar 15-noyabrdan kuchga kirgan, 24-noyabrga qadar davom etadi.
Izoh (0)