Австрияда бутун мамлакат бўйлаб локдаун эълон қилинди. Ҳукумат мажбурий вакцинацияни режалаштирмоқда

Австрияда 22 ноябрдан локдаун жорий этилади, деб эълон қилди мамлакат канцлери Александр Шалленберг ва соғлиқни сақлаш вазири Вольфганг Мюкштейн.

Der Standard нашрининг ёзишича, бутун мамлакат бўйлаб ҳукм сурадиган локдаун 20 кунга эълон қилинади, аммо 10 кундан кейин чеклов чоралари қайта кўриб чиқилиши мумкин. Локдаун олиб ташлангандан сўнг ҳам мамлакатнинг эмланмаган аҳолиси учун чекловлар ўз кучида қолади.

Локдаун пайтида Австрия бўйлаб спорт, маданий ва кўнгилочар тадбирлар бекор қилинади, кафелар, ресторанлар ва дўконлар ёпилади. Кундалик зарур маҳсулотларни сотадиганлар бундан мустасно. Шунингдек, локдаун пайтида мактабларда офлайн дарслар бекор қилинади.

Компанияларга ўз ходимларини масофадан ишлашга ўтказиш тавсия этилади ва ёпиқ жойларда, шу жумладан, иш жойида юқори ҳимояланган FFP2 турдаги ниқобларни тақиш мажбурий қилинади.

Австрия ҳукумати, шунингдек, коронавирусга қарши мажбурий вакцинация учун қонунчилик базасини тайёрлаётганини эълон қилди. У 1 февралдан жорий этилиши кутилмоқда.

Векторли вакциналарнинг икки компоненти билан эмланиш курсини аллақачон тугатганлар учун тўрт ойдан кейин бустер (кучайтирувчи) доза тавсия этилади. мРНК вакциналари билан эмланганлар ҳам тўрт ойдан кейин бустер дозани олиши мумкин. 1 январдан бошлаб COVID сертификатининг амал қилиш муддати учинчи дозадан кейин етти ойгача қисқартирилади.

Иқтисодиёт вазири Маргарет Шрамбок локдаунга изоҳ берар экан, Австрия вакцинация даражаси бўйича қўшни давлатлардан ортда қолаётгани учун мамлакат аҳолиси уялиши кераклигини айтди.

Жонс Ҳопкинс университети маълумотларига кўра, Австрияда ўтган сутка давомида 15 145 кишида коронавирус аниқланган, пандемия бошланганидан бери мамлакатда жами 1 011 465 киши инфекцияга чалинган. Австриянинг аҳолиси 8,9 миллион кишини ташкил этади.

Бундан аввал Австрияда COVID-19 га қарши эмланганлик тўғрисидаги сертификат ёки сўнгги 180 кун ичида касалликдан тузалганини тасдиқловчи ҳужжати йўқ 12 ёшдан катталар учун локдаун эълон қилинганди. Чекловлар 15 ноябрдан кучга кирган, 24 ноябрга қадар давом этади.