Armanistonda koronavirus pandemiyasi sababli joriy qilingan karantin rejimi yana olti oyga, 2022-yilning 20-iyuniga qadar uzaytirildi. Tegishli qaror hukumat tomonidan 11-noyabr kuni qabul qilingan, deb yozadi “Interfaks”.
Armanistonda karantin mamlakatga kirish va chiqish bo‘yicha alohida rejimni hamda o‘z-o‘zini yakkalash qoidalarini nazarda tutadi. U 20-dekabr kuni tugashi kerak edi.
So‘nggi bir necha kun ichida Armanistonda COVID-19 ga chalinish holatlari ortdi. Xususan, har kuni o‘rtacha 2 ming kishida infeksiya qayd etilib, 35—75 kishi kasallikdan vafot etmoqda.
Mamlakatda yashovchi qariyb uch million aholining salkam 700 mingdan ortig‘i koronavirusga qarshi emlangan.
Avvalroq Armaniston bosh vaziri Nikol Pashinyan mamlakatda koronavirus tufayli epidemiologik vaziyat nihoyatda keskinlashganini, biroq hukumat lokdaun e’lon qilish niyatida emasligini ma’lum qilgandi.
May oyida Nikol Pashinyan va uning rafiqasi Anna Akopyan koronavirusga qarshi emlangandi. Pashinyan va Akopyan qanday vaksina bilan emlangani haqida ma’lumot berilmagan.