APL. “Liverpul” “Arsenal”ga qarshi, Brendan Rojers “tulkilar”i “Chelsi”ni qabul qiladi, “Manchester Yunayted” Uotfordga safar qiladi
“Liverpul” — “Arsenal”, 20-noyabr, 22:30
2021/22-yilgi mavsumni Yurgen Klopp shogirdlari ideal tarzda boshlay olmadi. Ortda qolgan 11 turdan so‘ng mersisaydliklar 22 ochko to‘play oldi. “Liverpul” hisobida 6 ta g‘alaba, 4 ta durang va bitta mag‘lubiyat mavjud. Chempionlar Ligasida esa 4 ta o‘yinda 4 ta g‘alaba va pley-off yo‘llanmasi hal qilindi. O‘tgan turda “Liverpul” kutilmaganda “Vest Hem”ga (2:3) imkoniyatni boy berib qo‘ydi.
O‘tgan mavsumda “Arsenal” 8-o‘rinni egallagan holda Yevrokuboklardan quruq qolgandi. Mikel Arteta shogirdlari joriy mavsumni ham ko‘ngildagidek boshlamadi. “Brentford” (0:2), “Chelsi” (0:2) jamoalariga ketma-ket o‘yinlarda mag‘lub bo‘ldi. Artetaning iste’fosi kutilayotgandi. Ammo rahbariyat murabbiyga ishonch bildirdi. Natijada, “Manchester Siti”ga uchralgan 0:5 hisobidagi mag‘lubiyatdan so‘ng barcha musobaqalar doirasida ketma-ket 10 ta o‘yindan buyon yutqazmay kelmoqda. Hozirda londonliklar 20 ochko bilan beshinchi o‘ringa joylashgan.
Qolgan uchrashuvlar:
20-noyabr, shanba
“Lester” — “Chelsi”, 17:30
“Aston Villa” — “Brayton”, 20:00
“Byornli” — “Kristal Pelas”, 20:00
“Nyukasl” — “Brentford”, 20:00
“Norvich” — “Sauthempton”, 20:00
“Uotford” — “Manchester Yunayted”, 20:00
“Vulverhempton” — “Vest Hem”, 20:00
21-noyabr, yakshanba
“Manchester Siti” — “Everton”, 19:00
“Tottenhem” — “Lids”, 21:30
La Liga. Xavining “Barselona”dagi debyut o‘yini Kataloniya derbisiga to‘g‘ri keldi, “Real” “Granada” mehmoni bo‘ladi
“Barselona” — “Espanyol”, 20-noyabr, 01:00
Kataloniya derbisi Xavi uchun “Barselona” bosh murabbiyligidagi ilk o‘yin bo‘ladi. Ispaniyalik mutaxassis Dani Alvesni ham ortga qaytardi. Lekin braziliyalik himoyachi yanvar oyidan maydonga tushish huquqiga ega bo‘ladi.
“Barselona” oktabr oyida La Ligada “Real” (1:2) va “Rayo Valyekano”ga (0:1) imkoniyatni boy berdi hamda “Alaves” (1:1) bilan durang natija qayd etdi. Chempionlar Ligasida esa Kiyevning “Dinamo”sini 1:0 hisobida taslim etdi. So‘nggi turda “Selta” bilan 3:3 hisobida durang o‘ynadi. Ortda qolgan 12 turdan so‘ng katalonlar 17 ochko bilan 9-o‘rindan joy olgan.
Visente Moreno shogirdlari mavsumni nisbatan barqaror boshladi: “Espanyol” La Ligadagi dastlabki 6 turning 5 tasida mag‘lubiyatsiz seriya qayd etdi (3 ta g‘alaba, 2 ta durang). Oktabr oyining so‘ngida esa “Elche” (2:2) va “Atletik” (1:1) bilan durang o‘ynadi. Oxirgi o‘yinlarda esa “Xetafe”ga 1:2 hisobida imkoniyatni boy berdi, “Granada”ni 2:0 hisobida taslim etdi. “Espanyol” La Ligada 17 ochko bilan 11-o‘rindan joy olgan.
Qolgan uchrashuvlar:
19-noyabr, juma
“Levante” — “Atletik”, 01:00
20-noyabr, shanba
“Selta” — “Vilyarreal”, 18:00
“Sevilya” — “Deportivo”, 20:15
“Atletiko” — “Osasuna”, 22:30
21-noyabr, yakshanba
“Xetafe” — “Kadis”, 18:00
“Granada” — “Real”, 20:15
“Elche” — “Betis”, 22:30
“Real Sosyedad” — “Valensiya”, 01:00
22-noyabr, dushanba
“Rayo Valyekano” — “Malyorka”, 01:00
A Seriya. Eldor Shomurodov Shevchenko qo‘l ostiga o‘tgan sobiq jamoasiga qarshi, “Inter” yetakchini qabul qiladi, “Yuventus” esa Rimda mehmon
“Inter” — “Napoli”, 21-noyabr, 22:00
“Nerazzurilar” musobaqa jadvalida 25 ochko bilan 3-o‘rinni egallab turibdi. Milanliklar 1-o‘rindan 7 ochko ortda qolmoqda. “Inter” o‘z maydonida 5 o‘yinda 11 ochko jamg‘arishga muvaffaq bo‘lgan.
Gabriel Brazao va Kristian Eriksenning ushbu uchrashuvda maydonga tushmasligi aniq. Edin Jeko, Alessandro Bastoni, Stefan de Vrey va Arturo Vidalning esa o‘ynashi so‘roq ostida.
“Napoli” musobaqa yetakchilaridan biri. Neapolliklar “Milan” bilan bir xil 32 ochko jamg‘arib 1 va 2-o‘rinlarni bo‘lishib olgan. Luchano Spaletti shogirdlari mavsum boshidan buyon mag‘lubiyat nimaligini bilmay kelyapti. “Napoli” mehmondagi uchrashuvlarda 16 ochko jamg‘argan. Bu musobaqadagi eng yaxshi natija.
Kostas Manolas va Kevin Malkyui “Inter”ga qarshi uchrashuvda maydonga tusha olmaydi. Neapolliklar uchun bu jiddiy yo‘qotish emas.
“Jenoa” — “Roma”, 21-noyabr, 00:45
Andrey Shevchenko “Jenoa” bosh murabbiyligidagi ilk o‘yinini Joze Mourinyoning “Roma”siga qarshi o‘tkazadi. Genuyaliklar mavsumdagi oxirgi g‘alabasini 12-sentabr kuni “Kalyari”ga qarshi o‘yinda (3:2) qo‘lga kiritgan edi. Shundan buyon ketma-ket 9 o‘yinda g‘alaba nimaligini bilmay kelmoqda. Rahbariyat ukrainalik sobiq futbolchi Andrey Shevchenkoni jamoaga olib keldi. Shevchenkoning oldida “Jenoa”ni quyi ligaga tushib ketishdan saqlash vazifasi turibdi. “Jenoa” 12 turdan so‘ng 9 ochko bilan 17-o‘rindan joy olgan.
Joze Mourinyo shogirdlari esa 19 ochko bilan 6-o‘rinda bormoqda. “Roma”ning ham ishlari oxirgi paytlar ko‘ngildagidek kechmayapti. Rimliklar oxirgi 3 ta o‘yindan buyon g‘alaba qozona olmayapti. Eldor Shomurodov o‘tgan turda golsiz seriyasiga barham bergandi, biroq uning gol va golli uzatmasi rimliklarni mag‘lubiyatdan qutqarib qola olmadi.
Rahbariyat Joze Mourinyoga imkoniyat berish tarafdori. Portugaliyalik mutaxassis Rimliklar bilan uzoq yillik loyihani amalga oshirish niyatida. Biroq so‘nggi natijalardan keyin “Roma” muxlislarining sabr kosasi to‘lib bormoqda.
Qolgan uchrashuvlar:
20-noyabr, shanba
“Atalanta” — “Spetsiya”, 19:00
“Latsio” — “Yuventus”, 22:00
“Fiorentina” — “Milan”, 00:45
21-noyabr, yakshanba
“Sassuolo” — “Kalyari”, 16:30
“Bolonya” — “Venetsiya”, 19:00
“Salernitana” — “Sampdoriya”, 19:00
22-noyabr, dushanba
“Verona” — “Empoli”, 22:30
“Torino” — “Udineze”, 00:45
Bundesliga. “Bavariya” “Augsburg” mehmoni bo‘ladi, “Borussiya D” esa “Shtutgart”ga qarshi bahs olib boradi
“Augsburg” — “Bavariya”, 19-noyabr, 00:30
“Augsburg” Bundesligada 16-o‘rinda bormoqda. 11 turdan so‘ng jamoa hisobida 9 ochko mavjud. 10-turda “Augsburg” 4 o‘yinlik g‘alabasiz seriyasiga yakun yasadi (3 ta mag‘lubiyat va bitta durang): o‘z uyida “Shtutgart”ni 4:1 hisobida yengdi. So‘nggi turda esa mehmonda “Volfsburg”ga 0:1 hisobida mag‘lub bo‘ldi. Bu “Augsburg”ning mehmondagi ilk mag‘lubiyati edi.
Bundesligada Yulian Nagelsmann shogirdlarining ishlari yomon ketmayapti: myunxenliklar 28 ochko bilan musobaqa yetakchisi bo‘lib turibdi. Ikkinchi o‘rindagi “Borussiya D”dan 4 ochko oldinda.
“Bavariya” Germaniya Kubogida “Borussiya M”ga uchralgan 0:5 hisobidagi mag‘lubiyat alamini “Union Berlin”dan (5:2) oldi. Avvalgi turda myunxenliklar “Frayburg” ustidan 2:1 hisobida g‘alaba qozondi. Chempionlar Ligasida esa “Bavariya” 12 ochko jamg‘arib, E guruhi yetakchisi bo‘lib turibdi.
Qolgan uchrashuvlar:
20-noyabr, shanba
“Arminiya” — “Volfsburg”, 19:30
“Hoffenhaym” — “Leypsig”, 19:30
“Borussiya M” — “Groyter”, 19:30
“Bayer” — “Boxum”, 19:30
“Borussiya D” — “Shtutgart”, 19:30
“Union Berlin” — “Herta”, 22:30
21-noyabr, yakshanba
“Frayburg” — “Ayntraxt”, 19:30
“Mayns” — “Kyoln”, 21:30
Liga 1. “Lion” va “Marsel” o‘rtasidagi klassik to‘qnashuv, “PSJ” o‘n ochkolik farqni saqlab qoladimi?
“PSJ” — “Nant”, 20-noyabr, 21:00
Parijliklar o‘n ochkolik farq bilan Liga 1 da yetakchilik qilmoqda. “PSJ” 13 turdan so‘ng 34 ochko jamg‘argan bo‘lsa, ikkinchi o‘rindagi “Lens” 24 ochko to‘plagan. Pochettino jamoasi mavsumni juda yaxshi boshladi: ketma-ket 8 turda g‘alaba qozondi. Hozirda Fransiya chempionatida intriga ozroq yo‘qolgan.
“Nant” 18 ochko bilan 10-o‘rindan joy olgan. “Kanareykalar” musobaqada 5 ta g‘alaba, 5 ta mag‘lubiyat va 3 ta durang natija qayd etgan. “Nant” Fransiya chempionatida mehmondagi 6 o‘yinning faqat bittasida g‘alaba qozonishni uddalagan.
Qolgan uchrashuvlar:
19-noyabr, juma
“Monako” — “Lill”, 01:00
20-noyabr, shanba
“Reyms” — “Monpelye”, 01:00
21-noyabr, yakshanba
“Brest” — “Lens”, 17:00
“Anjer” — “Loryan”, 19:00
“Mets” — “Bordo”, 19:00
“Strasbur” — “Reyms”, 19:00
“Trua” — “Sent-Etyen”, 19:00
“Klermon” — “Nitssa”, 21:00
“Lion” — “Marsel”, 00:45
Izoh (0)