“PSJ” ayollar jamoasida yuzaga kelgan vaziyat keng muhokamaga sabab bo‘lmoqda. Gap shundaki, jamoa a’zolaridan biri noma’lum shaxslar tomonidan kaltaklangan. Avvaliga buni uyushtirishda sportchining yaqin do‘sti tarkibdagi raqobat sabab qilgan bo‘lishi mumkinligi taxmin qilindi. Hozirda esa bu ishga “Barselona” sobiq himoyachisi Erik Abidalning aloqasi borligi aytilmoqda. Quyida ikki haftadan beri futbol ommasining diqqat markazida turgan voqea tafsilotlari taqdim etiladi.
4-noyabr kuni Parij jamoasi futbolchilaridan biriga hujum uyushtirildi: niqob taqqan ikki erkak yarim himoyachi Xeyra Hamrovining mashinasiga hujum qilgan, sportchini tashqariga olib chiqib, armatura bilan oyoq qismiga zarba bergan. Jinoyatchilar Hamrovi bilan mashinada birga ketayotgan jamoadoshi Aminata Dialloni esa shunchaki qo‘rqitish bilan cheklangan.
Futbolchilarning buyumlari o‘g‘irlanmagan, guvohlarning aytishicha, ularning asosiy nishoni Xeyraning oyoqlari bo‘lgan. Hamrovi shifoxonaga yotqiziladi va jarohati sabab Chempionlar Ligasidagi “Real”ga qarshi uchrashuvni o‘tkazib yuboradi.
10-noyabr kuni mashinada Xeyra bilan birga ketgan Diallo gumondor sifatida hibsga olindi. Qizlar “PSJ” safida bir pozitsiyada o‘ynaydi — “Real”ga qarshi o‘yinda Hamrovi o‘rniga aynan Diallo maydonga tushadi. Asosiy tarkibdagi o‘rin uchun raqobat futbolchi qizlar o‘rtasidagi mojaroning sababi bo‘lishi mumkinligi taxmin qilindi. Hamrovining o‘zi politsiyaning bu versiyasidan hayratga tushadi. Chunki ikki ayol doim birga yurgan, qadrdon do‘st bo‘lgan.
Diallo hibsga olingach, “PSJ” voqea yuzasidan rasmiy bayonot berdi: “Aminata Diallo ‘PSJ’ futbolchisiga hujum uyushtirgani uchun hibsga olinganini klub tasdiqlaydi. Rahbariyat ayollar jamoasining xavfsizligi va salomatligi uchun barcha zarur choralarni ko‘radi. ‘PSJ’ faktlarni aniqlash uchun politsiya bilan hamkorlik qiladi. Voqealar rivojini kuzatamiz va kerakli choralarni ko‘ramiz”.
L’Equipe nashri Hamrovi tergov jarayonida “hech kimning asosiy tarkibdagi o‘rnini olib qo‘ymagani” va “Parij klubiga endigina kelgani kimdadir hasad uyg‘otgan bo‘lishi mumkinligi” haqida gapirgan. “PSJ”ga qadar Xeyra bir necha yil “Barselona”da muvaffaqiyatli o‘ynagan va 2021-yilning yozida Parij jamoasiga kelib qo‘shilgandi.
Politsiya hujum Hamrovi va u bilan don olishib yurgan erkak sababli yuzaga kelgan, degan versiyani ham ilgari surgan. Hamrovi va Dialloning guvohlik berishicha, jinoyatchilar uylangan erkak haqida nimalardir degan.
Shu vaqtda yana bir ma’lumot paydo bo‘ldi: o‘zini Xeyraning sobiq yigiti deb tanishtirgan noma’lum erkak qizning 4 nafar jamoadoshiga qo‘ng‘iroq qilib, hayoti barbod bo‘lgani va Hamrovidan qasos olmoqchi ekanini aytgan. Bir necha futbolchi hujumdan ikki-uch kun avval ularning mashinalari ta’qib qilingani haqida xabar berdi.
Taxminan bir vaqtning o‘zida OAVda Erik Abidal ismi paydo bo‘ldi. Avvaliga Abidal ham voqeaga aloqador bo‘lishi mumkinligi taxmin qilindi. Keyinroq Le Monde nashri Hamrovining telefonidagi SIM karta Abidalning nomiga olinganini aniqladi. Xeyra politsiyachilarga SIM kartani sobiq yigiti berganini aytgan.
“PSJ” futbolchilari politsiyaga Hamrovi Erik bilan hujumdan keyin bog‘langan bo‘lishi mumkinligi haqida aytgan. Ularning qayd etishicha, qiz Abidaldan rafiqasi bu ishga qanchalik aloqador ekani haqida so‘ragan. Xeyra “Barselona”da o‘ynab yurgan vaqtida (2018–2021-yillar) Abidal bilan tanishgan bo‘lishi mumkin. Ma’lumot uchun, Erik Abidal 2018-yildan 2020-yilga qadar kataloniyaliklarning sport direktori lavozimida faoliyat olib borgan.
Abidal ham tergovga jalb etilishini prokuror tasdiqladi. Fransiya terma jamoasi sobiq himoyachisining rafiqasi Hayot ham so‘roqqa tutilishi mumkinligi inkor etilmadi.
“Agar prokuror Abidalni chaqirsa, u muammosiz yetib boradi va barcha savollarga javob beradi. To‘g‘risi, mijozim bu ishga qanday aloqasi borligini hanuzgacha tushunganicha yo‘q”, — deydi Erik Abidalning advokati.
Hayot Abidal allaqachon aloqaga chiqqan va barcha savollarga javob berishga tayyor ekanini ma’lum qilgan. Advokatning so‘zlariga ko‘ra, Abidal xonim bu ishga umuman aloqador emas. Erik va Hayot 2003-yilda turmush qurgan, juftlikning besh nafar farzandi bor.
Hamrovi hech qachon turmush qurgan erkak bilan munosabatda bo‘lmagani haqida politsiyaga ma’lum qilgan. Shuningdek, u OAVda chiqish qilib, tergov vaqtida o‘zining shaxsiy hayotiga hurmat bilan munosabatda bo‘lishlarini iltimos qilgan.
Izoh (0)