Dunyo va o‘zbek sportiga oid 18-noyabr tongining eng muhim xabarlari dayjesti bilan tanishing.
O‘zbekiston
O‘zbekiston U-16 chempionatida yarim final juftliklari ma’lum bo‘ldi
17-noyabr kuni bo‘lib o‘tgan chorak final o‘yinlaridan keyin barcha yarim finalchilar nomi ma’lum bo‘ldi. “Nasaf” klubi “Andijon”ga qarshi bahs olib borsa, “Bunyodkor” va “Paxtakor” jamoalari o‘zaro to‘qnash keladi. O‘yinlar 19-noyabr kuni o‘tkaziladi.
Jahon
Zinedin Zidan “Manchester Yunayted”ni boshqarishdan bosh tortdi
Manchesterliklar rahbariyati Ole-Gunnar Sulsher iste’foga chiqariladigan bo‘lsa, uning o‘rniga Zinedin Zidanni olib kelish varianti ustida bosh qotirayotgandi. Biroq fransiyalik mutaxassis o‘zini APLda ishlashga tayyor deb hisoblamayapti va kamida yozgacha dam olmoqchi, deya xabar qilmoqda Bild.
49 yoshli Zidan yozda “Real” boshqaruvini tark etgandi.
Manchester Evening News xabariga ko‘ra, “Manchester Yunayted”ning asosiy maqsadi “Lester” ustozi Brendan Rojersni olib kelish bo‘lib turibdi. Shuningdek, klub short-listidan Luis Enrike (Ispaniya) va Erik ten Xag (“Ayaks”) kabi mutaxassislar ham joy olgan.
Garet Beyl jarohat sabab 2-3 haftaga safdan chiqdi
“Real” hujumkor yarim himoyachisi JCh—2022 saralashi doirasida Belarusga qarshi kechgan bahsda (5:1) futbolchi boldir mushagida muammo his qilgan va tanaffusda zaxiraga olingandi.
Cope xabariga ko‘ra, uelslik futbolchi 2-3 haftaga safdan chiqqan.
Beyl joriy mavsum “Real” safida bor-yo‘g‘i uchta o‘yinda ishtirok etdi. Futbolchi jarohati bois madridliklar tarkibida avgustdan beri maydonga tushmayapti.
Rasman: Ramon Planes “Barselona”ni tark etdi
Katalon klubi jamoa texnik kotibi Ramon Planesning ketganini e’lon qildi. Qayd etilishicha, 2022-yilning yoziga qadar mo‘ljallangan shartnoma Planesning iltimosiga ko‘ra bekor qilingan.
Planes 2020-yilning avgust oyida “Barselona”da Erik Abidalning o‘rnini egallagandi.
Avvalroq “Barselona” Planes o‘rniga Karles Puyol va Yordi Kroyf variantlarini ko‘rib chiqayotgani xabar qilingandi.
Messi — 2021-yilning eng yaxshi o‘yinchisi
Goal nashri o‘z obunachilari o‘rtasida yilning eng yaxshi o‘yinchisini aniqlash uchun so‘rovnoma o‘tkazdi. Unda birinchi o‘rin “PSJ” hujumchisi Lionel Messiga nasib etdi. Ikkinchi pog‘onadan “Manchester Yunayted” vakili Krishtianu Ronaldu o‘rin olgan bo‘lsa, “Bavariya” forvardi Robert Levandovski kuchli uchlikka yakun yasab berdi.
- Lionel Messi
- Krishtianu Ronaldu
- Robert Levandovski
- Muhammad Saloh
- Kilian Mbappe
- Erling Holand
- Karim Benzema
- Ngolo Kante
- Kevin de Bryuyne
- Neymar.
“Barselona” forvardi 2021-yilda Niderlandiya terma jamoasi safida 17 ta gol urdi. Bu Yevropa terma jamoalarida to‘p suradigan futbolchilar orasidagi eng yaxshi natija bo‘ldi.
Bu borada ikkinchi o‘rindan Angliya vakili Harri Keyn (16 ta gol) o‘rin olgan bo‘lsa, portugaliyalik Krishtianu Ronaldu (13) ulardan keyin pog‘onadan joy olgan.
Kanelo og‘ir vazn toifasida chempionlik jangini o‘tkazadi
Supero‘rta vazn toifasida mutlaq Jahon chempioni Saul Alvares (57-1, 39 KO) birinchi og‘ir vazn toifasida jang qiladi. Bu haqida Butunjahon boks ittifoqining (WBC) kongressida ma’lum qilingan, deya xabar qilmoqda Boxing Insider.
Unga Ilunga Makabu (28-2, 25 KO) raqib bo‘ladi. Jang WBC kamari uchun kechadi.
Makabu ketma-ket 9 ta jangdan iborat g‘alabali seriya qayd etmoqda. U 2020-yilning yanvarida WBC kamariga ega chiqqandi. O‘sha yilning dekabrida uni bir marta himoya qilishga ham ulgurdi.
Kanelo so‘nggi jangini noyabr boshida o‘tkazib, Kaleb Plantni mag‘lub etdi va mutlaq chempionga aylandi.
Izoh (0)