Navoiy viloyati Qiziltepa tumanida bir kecha tunash uchun notanish uyda qolgan erkak uy egasiga nam salfetkani 100 million so‘m deb bergani aniqlandi. Bu haqda viloyat Ichki ishlar boshqarmasi xabar qildi.
Qayd etilishicha, u kechki mahal qiziltepalik notanish fuqaro uyiga borib, bir kecha tunash uchun joy so‘ragan. Ertalab uy egasiga guruch savdosi bilan shug‘ullanishi aytib, Xorazmdan bir “Kamaz” yuki kelayotganini bildirgan. Oldida katta kupyuradagi pullar borligini, yukning yo‘l xarajatlari uchun esa mayda pul kerakligini aytgan erkak aldov yo‘li bilan uy egasidan 18 million 500 ming so‘m olgan.
Bundan tashqari, nam salfetkalardan qora selofanga o‘rab taxlangan buyumni 100 million deb ko‘rsatib, uni saqlab turish uchun xonadon egasiga bergan. Shuningdek, jabrlanuvchining 3 million so‘mlik telefonini ham olgan.
“Bir ahmoqgarchilik bo‘ldi-da, boshqa qaytarilmaydi”, — degan sudlanuvchi.
Ma’lum bo‘lishicha, u Jinoyat kodeksining 168-moddasi (firibgarlik) bilan 4-marta javobgarlikka tortilmoqda. U avval ham Samarqand, Qashqadaryo va Navoiy viloyatlarida sudlanib, jazoga tortilgan.
Mavzuga doir:
- Andijonda mijozining jami 100 ming dollarlik muammosini “hal etib bergan” ekstrasens qo‘lga olindi
- Samarqandda irim-sirim orqali beshikdagi bolani davolash maqsadida uy egasining tilla taqinchoqlarni o‘g‘irlab ketgan ayollarga sud hukmi o‘qildi
- Namanganda o‘zini bloger deb tanishtirib sudga ta’sir o‘tkazishga uringan shaxsga nisbatan jinoyat ishi qo‘zg‘atildi
Izoh (0)