Qashqadaryo viloyatining Yakkabog‘ tumanida faoliyat yurituvchi bloger Elmurod Odilov Yakkabog‘ tumani hokimi Lutfiddin Abdullayev ishdan bo‘shash uchun viloyat rahbari nomiga ariza yozganini, arizaga tumandagi blogerlarning unga bosim o‘tkazayotgani asos bo‘lganini yozdi. Hokimlik axborot xizmati esa buni bo‘hton deb atamoqda.
“Hozir tuman hokimi bilan shu haqda gaplashdim. Hokim bu g‘irt bo‘hton ekanini ma’lum qildi”, — deydi Yakkabog‘ hokimi matbuot kotibi Sherzod Hasanov.
Bu haqda fikr bildirgan tumandagi blogerlarning biri O‘raljon Kamolov “hokim ishdan ketsa ham bizni aybdor qilmasin”, desa, avtobloger Maqsud Muzaffarov esa “hokim avtoblogerlar olib chiqqan barcha muammolarni, jumladan, tumandagi svetoforga ehtiyoj bor chorrahalarga svetofor o‘rnatib chiqdi”, — deydi.
Bloger Elmurod Odilov biroz o‘tgach, shaxsiy Telegram kanalidagi mazkur postini tahrirlab, butkul o‘zgartirdi.
Eslatib o‘tamiz, Yakkabog‘ tumani rahbarlarining internetda shov-shuvli chiqishlari 2019-yil iyul oyidan boshlangan. 2019-yil tumanda faoliyat yurituvchi tadbirkor do‘konini buzmoqchi bo‘lgan hokim o‘rinbosarini yoqib yuborib, jamoatchilik e’tiborini tortgan bo‘lsa, tadbirkorlar hokim o‘rinbosari 30 ga yaqin do‘konni buzib, kompensatsiya to‘lamaganini bildirgandi. 2020-yil 19-may kuni tumanda ish boshlagan Lutfiddin Abdullayev esa internetda metan zapravka qurgan tadbirkor ayol hasratiga sabab bo‘lishi bilan tanilgan bo‘lib, 311 million so‘mlik Captiva xarid qilmoqchiligi bilan shov-shuvlar girdobida qolgandi.
Kuni kecha YTHga uchragan ana shu Captiva esa ancha tinchib qolgan shov-shuvlarni yana qo‘zg‘adi.
Izoh (0)