Namangan viloyati Yangiqo‘rg‘on tumanida 13 yoshli, 2008-yilda tug‘ilgan bola yashash uyi yotoqxonasidagi sandiqdan 65 ming dollar o‘g‘irladi. Bu haqda viloyat Ichki ishlar boshqarmasi xabar berdi.
Ma’lum bo‘lishicha, 13-noyabr kuni 67 yoshli fuqaro IIBga ariza bilan murojaat qilib, avgust oyidan noyabr oyigacha bo‘lgan vaqt oralig‘ida noma’lum shaxs yotoqxonasidagi sandiqda bo‘lgan 65 ming dollarini o‘g‘irlab ketganini aytgan. Holat yuzasidan tuman jinoyat qidiruv bo‘limi tezkor xodimlari va HPMB inspektorlari tomonidan qidiruv-surishtiruv ishlari olib borilgan.
Ta’kidlanishicha, o‘rganishlar natijasida jinoyatni Yangiqo‘rg‘on tumanidagi maktabning 7-sinf o‘quvchisi, murojaat yo‘llagan fuqaroning 2008-yilda tug‘ilgan nabirasi sodir etgani aniqlangan.
Qayd etilishicha, holat bo‘yicha Jinoyat kodeksining 169-moddasi (o‘g‘rilik) 4-qismi bilan jinoyat ishi qo‘zg‘atilgan.
Izoh (0)