Shavkat Abdurazzoqov boshchiligidagi Namangan viloyati delegatsiyasi Rossiyada bo‘lib turibdi. Bu haqda “Daryo”ga viloyat hokimligi axborot xizmati ma’lum qildi.
Delegatsiya Moskvadagi Lotte Plaza mehmonxonasida rossiyalik ishbilarmonlar bilan muzokaralar o‘tkazgan va bir qator shartnomalar imzolagan.
Jumladan, 17-noyabr kuni Shavkat Abdurazzoqov Rossiyaning Siberian Wellness kompaniyasi bosh direktori Natalya Goroxovskaya bilan uchrashgan. Mazkur uchrashuvda Namanganda kompaniya bilan hamkorlikda meva-sabzavot klasterini tashkil etish, xususan, intensiv bog‘lar barpo etish, meva-sabzavotlarni qayta ishlash va zamonaviy muzlatgich tashkil etish bo‘yicha umumiy qiymati 60 million dollar bo‘lgan loyihani amalga oshirish bo‘yicha kelishuv imzolangan.
“Ushbu loyiha 2022–2023-yillarda amalga oshirilishi va buning natijasida 1000 nafarga yaqin kishining bandligi ta’minlanishi ko‘zda tutilgan”, — deyiladi viloyat hokimligi axborot xizmati xabarida.
Eslatib o‘tamiz, O‘zbekiston prezidenti joriy yil 19-noyabr kuni Rossiyaga boradi. Moskvada ikki mamlakat yetakchilari uchrashuv o‘tkazadi.
Izoh (0)