Шавкат Абдураззоқов бошчилигидаги Наманган вилояти делегацияси Россияда бўлиб турибди. Бу ҳақда «Дарё»га вилоят ҳокимлиги ахборот хизмати маълум қилди.
Делегация Москвадаги Lotte Plaza меҳмонхонасида россиялик ишбилармонлар билан музокаралар ўтказган ва бир қатор шартномалар имзолаган.
Жумладан, 17 ноябрь куни Шавкат Абдураззоқов Россиянинг Siberian Wellness компанияси бош директори Наталя Гороховская билан учрашган. Мазкур учрашувда Наманганда компания билан ҳамкорликда мева-сабзавот кластерини ташкил этиш, хусусан, интенсив боғлар барпо этиш, мева-сабзавотларни қайта ишлаш ва замонавий музлатгич ташкил этиш бўйича умумий қиймати 60 миллион доллар бўлган лойиҳани амалга ошириш бўйича келишув имзоланган.
«Ушбу лойиҳа 2022–2023 йилларда амалга оширилиши ва бунинг натижасида 1000 нафарга яқин кишининг бандлиги таъминланиши кўзда тутилган», — дейилади вилоят ҳокимлиги ахборот хизмати хабарида.
Эслатиб ўтамиз, Ўзбекистон президенти жорий йил 19 ноябрь куни Россияга боради. Москвада икки мамлакат етакчилари учрашув ўтказади.
Изоҳ (0)