O‘zbekiston hududi orqali Iroq, Suriya, Yaman, Livan, Liviya va Afg‘oniston fuqarolari — tranzit yo‘lovchilarning Belarus hududiga kirishiga hamda ularga aviachiptalar sotilishiga 2021-yil 17-noyabrdan vaqtinchalik cheklovlar o‘rnatildi. Bu haqda Fuqaro aviatsiyasi agentligi xabar qildi.
Qayd etilishicha, O‘zbekistonda ro‘yxatdan o‘tgan rezident aviakompaniyalar tomonidan mazkur davlatlar fuqarolari – tranzit yo‘lovchilarga sotilgan aviachiptalar aniqlangan taqdirda ushbu yo‘lovchilarga chipta puli belgilangan tartibda jarima qo‘llamagan holda qaytarilishi lozim.
Mazkur cheklovlar Iroq, Suriya, Yaman, Livan, Liviya va Afg‘oniston davlatlarining diplomatik pasport yoki Belarusda doimiy yashash uchun berilgan yashash guvohnomasiga ega fuqarolariga nisbatan tatbiq etilmaydi.
Bundan avval Iroq Belarusdagi qochqinlar lageridan o‘z fuqarolarini evakuatsiya qilishni boshlagani, Lukashenko chegaradagi migrantlar uchun boshpana tashkillashtirish bo‘yicha topshiriq bergani hamda Yevropa Ittifoqi Minsk aeroportiga qarshi sanksiyalar joriy etishi mumkinligi haqida xabar berilgandi.
Izoh (0)