Xorazm viloyati Favqulodda vaziyatlar boshqarmasi xodimi tadbirkorga yerni rasmiylashtirib berish evaziga pora olayotganida ushlandi. Bu haqda Davlat xavfsizlik xizmati xabar berdi.
Ma’lum qilinishicha, u 30 yoshli mahalliy fuqaro bilan kelishgan holda, Urganch tumanidagi MChJ balansida bo‘lgan 30 sotix yer maydonini tadbirkorlik bilan shug‘ullanmoqchi bo‘lgan shaxs nomiga tanishlari orqali rasmiylashtirib berish evaziga 50 ming dollar talab qilgan.
DXXning Xorazm viloyati bo‘yicha boshqarmasi va Bosh prokuratura huzuridagi departamentning hududiy boshqarmasi xodimlari tomonidan o‘tkazilgan tezkor tadbirda ular so‘ralgan puldan 30 ming dollarni olgan vaqtida ushlangan.
Xorazmda kuzatilgan yana bir holatda esa Xiva shahrida yashovchi 37 yoshli fuqaro tadbirkorlik bilan shug‘ullanmoqchi bo‘lgan shaxsga Urganch shahri hududidan 2 sotix yer maydoni olib berish uchun 30 ming dollar talab qilib, oldindan 20 ming dollar olgan vaqtida ushlangan.
Hozirda mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Namanganda tuman soliq inspeksiyasi boshlig‘i 15 ming dollar pora olayotganida ushlangani, Olmaliqda “Toshkent suv ta’minoti” filiali boshlig‘i pora bilan qo‘lga tushgani haqida xabar berilgan edi.
Mavzuga doir:
- DXX Qibrayda 460 gektar yer uchun 3,7 mln dollar so‘ragan shaxsni ushladi
- Andijonda 1 gektar yer uchun hokim qarorini chiqarib, kadastr hujjatini rasmiylashtirib berish evaziga 50 ming dollar so‘ragan mansabdor qo‘lga olindi
- Farg‘onada 50 sotix yerni 25 ming dollarga noqonuniy sotmoqchi bo‘lgan MChJ boshlig‘i ushlandi
Izoh (0)