Тошкент вилояти Олмалиқ шаҳрида «Тошкент сув таъминоти» Олмалиқ шаҳар филиали бошлиғи тадбиркордан пора олаётган вақтда қўлга тушди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, департаментнинг Тошкент вилоят бошқармаси томонидан тадбиркорлик субъектларининг ҳуқуқларини ҳимоя қилиш юзасидан вилоят ИИБ ходимлари билан ҳамкорликда тезкор тадбир ўтказилган.
Унда «Тошкент сув таъминоти» Олмалиқ шаҳар филиали бошлиғи И.Ш. филиалнинг етакчи муҳандиси Ф.К. билан олдиндан тил бириктириб, «Ф.Л.» МЧЖ таъсисчиси Э.дан савдо мажмуасини қуришда сарфланаётган сув учун расмийлаштирилган баённомани базага киритмаслик эвазига 2000 АҚШ доллари пора талаб қилиб, шундан 1000 АҚШ долларини Ф.К. олган вақтида ашёвий далиллар билан ушланган.
Мазкур ҳолат юзасидан Жиноят кодексининг 210-моддаси (пора олиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Жиззахда туман прокурори ўринбосари 8 минг доллар пора билан, Андижон прокуратураси ходими 15 минг доллар пора билан ҳамда Қорақалпоғистонда ИИВ ходими пора олаётганида қўлга тушгани ҳақида хабар берилганди.
Изоҳ (0)