Ukraina prezidenti Vladimir Zelenskiy koronavirusga qarshi emlashning to‘liq kursidan o‘tgan har bir fuqaroga ming grivna (38 dollar) to‘lanishini aytdi. Biroq bu pullarni faqat madaniy-ko‘ngilochar mashg‘ulotlarga sarflash mumkin, deb yozadi Meduza.
“Ushbu pulga sport zaliga a’zolikni sotib olish, kino, teatr, muzey, konsert yoki ko‘rgazma zaliga tashrif buyurish, Ukraina bo‘ylab sayohat qilish uchun chipta sotib olish mumkin bo‘ladi”, — dedi davlat rahbari ijtimoiy tarmoqlarda e’lon qilingan videomurojaatida.
Dastur 19-dekabrdan ishga tushiriladi. Unda allaqachon vaksina olganlar ham, endigina emlanmoqchi bo‘lganlar ham ishtirok eta oladi. To‘lovni “Diya” (“Harakat”) ilovasi orqali olish mumkin.
Dasturni amalga oshirish uchun budjetdan jami olti milliard grivna (226,8 mln dollar) ajratiladi.
Ukraina Sog‘liqni saqlash vazirligi ma’lumotlariga ko‘ra, 2021-yil fevralda emlash kampaniyasi boshlanganidan to 15-noyabrgacha mamlakatda 12,3 million kishi vaksinaning birinchi dozasi bilan emlangan, deyarli 8,9 million kishi to‘liq emlangan.
Vladimir Zelenskiyning o‘zi esa mart oyida koronavirusga qarshi emlangan edi. Zelenskiyni emlash uchun AstraZeneca tomonidan Hindistondagi zavodda ishlab chiqarilgan Covishield vaksinasidan foydalanilgan.
Ukrainada pandemiya boshidan beri jami 3 244 749 kishi koronavirus infeksiyasiga chalingan, shulardan 2 664 373 kishi tuzalib ketgan, 77 985 kishi vafot etgan.
Mavzuga doir:
- Nyu-York aholisiga koronavirusga qarshi emlanish evaziga 100 dollardan to‘lash boshlanadi
- 1,5 mln dollarlik mukofot, bepul pitssa va tovuq. Jahonda COVID-19’ga qarshi emlanganlar qanday rag‘batlantirilmoqda?
- Tailandda aholini emlanishga qiziqtirish uchun sigirlar va tilladan foydalanilmoqda, AQSh koronavirus laboratoriyada yaratilgani bo‘yicha dalillarga ega, Yevroittifoq vaksinatsiya sertifikatini kelishib oldi. Koronaxabarlar
Izoh (0)