Tailandda aholini emlanishga qiziqtirish uchun sigirlar va tilladan foydalanilmoqda, AQSh koronavirus laboratoriyada yaratilgani bo‘yicha dalillarga ega, Yevroittifoq vaksinatsiya sertifikatini kelishib oldi. Koronaxabarlar

21-may holatiga ko‘ra, butun dunyoda COVID-19’ni yuqtirganlar soni 165 558 841 kishini tashkil qilmoqda. Kasallanganlar soni bo‘yicha yuqori beshlikdan AQSh (33 million), Hindiston (26 million), Braziliya (15,8 million), Fransiya (5,9 million) va Turkiya (5,1 million) o‘rin olgan. Virus oqibatidagi o‘limlar esa 3 431 054 taga teng bo‘lib turibdi.

AQSh: COVID-19 laboratoriyada yaratilgani borasida jiddiy dalillar bor

AQSh Vakillar palatasining Razvedka qo‘mitasidagi respublikachilar koronavirus Xitoyda laboratoriya sharoitida kelib chiqqani bo‘yicha “muhim bilvosita dalillar” borligini ma’lum qildi. Qo‘mita a’zolari AQSh hukumatini virusning kelib chiqishi bo‘yicha tadqiqotlar olib borilishi uchun Xitoyga bosim o‘tkazishga chaqirdi.

“Muhim bilvosita dalillar COVID-19 avj olishiga Uxan virusologiya universitetidan virus sizib chiqishi olib kelgan bo‘lishi mumkinligi haqidagi jiddiy tashvishlarni uyg‘otmoqda”, — deyiladi ma’ruzada.

Respublikachilarning qayd etishicha, 2017-yildayoq Xitoydagi amerikalik diplomatlar Uxandagi laboratoriyada zarur xavfsizlik me’yorlariga rioya qilinmasdan xavfli koronaviruslar tadqiqotlari olib borilayotgani haqida xabar qilib turgan. Ma’ruzada aytilishicha, 2019-yilda laboratoriyaning bir nechta xodimlarida COVID-19 oqibatlariga o‘xshagan simptomlar kuzatilgan. Shuningdek, Xitoy harbiylarining Uxandagi institutga aloqasi tilga olingan. Bundan tashqari, virusning tabiiy kelib chiqishi borasidagi dalillar kamligi aytilgan.

Yevroittifoqda vaksinatsiya sertifikati bo‘yicha kelishuvga erishildi

Yevroparlament va Yevroittifoq kengashi Yevropa Ittifoqi aholisi uchun vaksinatsiya sertifikatini joriy qilish haqida dastlabki kelishuvga erishdi.

26-may kuni matn bo‘yicha Yevroparlamentning fuqaro erkinliklari bo‘yicha profilli qo‘mitasi ovoz beradi. Yevroittifoq uchun koronavirus sertifikatlari bo‘yicha kelishuv Yevroparlamentning 7—10-iyun kunlari Bryusselda bo‘lib o‘tadigan yalpi sessiyasida uzil-kesil tasdiqlanishi rejalashtirilgan.

Sertifikat raqamli yoki qog‘oz shaklida bo‘lib, odamning vaksina olgani, yaqinda testi manfiy chiqqani yoki infeksiyadan sog‘ayganidan darak beradi. Amalda bu uchta har xil sertifikat bo‘ladi.

Yevroittifoq mamlakatlari ittifoqning boshqa davlatlarida berilgan sertifikatlarni tan olish yoki olmaslikni mustaqil hal qiladi.

Tailandda aholi COVID-19’ga qarshi emlanishga sigirlar va oltin yordamida jalb qilinmoqda

Tailand aholisini lotereyalar, do‘konlarga sovg‘a kuponlari va hatto naqd pul yordamida koronavirusga qarshi emlanishga jalb etishga qaror qilindi.

Tailandning infeksiya tarqalishi bilan bog‘liq vaziyat eng og‘ir bo‘lgan bir nechta hududlarida shunday aksiyalar o‘tkazilmoqda. Xususan, Chiangmay provinsiyasida emlangan fuqarolar o‘rtasida 318 dollarlik sigirlar lotereyaga qo‘yildi. G‘oliblar haftada bir marta tasodifiy yo‘l bilan aniqlanadi. Bundan tashqari, vaksinatsiya haqidagi sertifikatni taqdim etganlar mahalliy do‘kon va restoranlarda 10 foizlik chegirmaga ega bo‘ladi.

Kxonken provinsiyasida esa qimmatbaho metallardan yasalgan taqinchoqlar lotereyaga qo‘yildi. Koronavirusga qarshi emlanganlar, xususan, tilla zanjir yutib olishi mumkin.

Tailand hukumatining tashabbusi allaqachon o‘z samarasini ko‘rsatdi: tumanlardan birining rahbari aytishicha, bir-ikki kunda emlanish uchun ro‘yxatdan o‘tganlar soni o‘n marta oshgan.

Shuningdek:

• Yaponiya hukumati Moderna hamda AstraZeneca kompaniyalarining COVID-19’ga qarshi vaksinalarini rasman ma’qulladi. Mamlakatda immunizatsiya dasturi fevralda boshlangan bo‘lib, o‘shandan buyon Pfizer preparati qo‘llanilayotgan edi. Hozirgacha aholining qariyb 4 foizi emlangan (kamida bitta doza bilan).
• Parijdagi Eyfel minorasi tashrif buyuruvchilar uchun 16-iyuldan boshlab ochiladi, onlayn chiptalarni 1-iyundan sotib olish mumkin. Tashrifchilar soni kuniga 10 ming kishi bilan cheklanadi. Eyfel minorasi Luvr va Versal bilan birga 2020-yil martida koronavirus tarqalishi xavfi sababli yopilgan edi, ammo minora uch oydan so‘ng qayta ochilib, kuzda yana yopib qo‘yilgandi.
• Vengriyada koronavirusga qarshi emlanganlar soni 5 million kishidan oshsa, cheklovlar ancha yumshatiladi. Ushbu ko‘rsatkichga kelayotgan dam olish kunlari erishish kutilmoqda. Shundan keyin, xususan, komendantlik soati bekor qilinadi hamda jamoat joylarida niqob taqmaslikka ruxsat beriladi.