Yaponiyadagi “Genkay” atom elektr stansiyasi (AES) hududida yong‘in sodir bo‘ldi. Bu haqda NHK agentligi xabar berdi.
Kyushu Electric Power matbuot xizmatining ma’lum qilishicha, yong‘in bir soat ichida to‘liq o‘chirilgan. Shu bilan birga, olov energiya bloklari ishiga ta’sir qilmagan.
Yong‘in AES hududidagi “jiddiy avariyalarga javob qaytarish obyekti” qurilayotgan maydonda sodir bo‘lgan, u yerda havo kemalari tomonidan teraktlar sodir etilgan taqdirda foydalanish uchun zaxira dispetcherlik xonasi mavjud. Yong‘in chiqqan paytda qurilish hali davom etayotgan edi.
Xabarga ko‘ra, yong‘in natijasida hech kim jabrlanmagan, radioaktiv moddalar ajralib chiqmagan, atrof-muhitga hamda 3 va 4-energetika bloklariga zarar keltirilmagan.
Ayni paytda mutaxassislar hodisa sabablari va holatlarini o‘rganmoqda.
Eslatib o‘tamiz, bundan o‘n yil oldin Yaponiyadagi Fukusima AESda 20 ming kishining hayotiga zomin bo‘lgan ulkan falokat yuz bergandi. Qariyb 9 ballik zilzila ortidan kelib chiqqan sunami AESni ishdan chiqargan. Oqibatda xavfli radiatsiya tarqalib, inson hayoti va atrof-muhitga tahdid sola boshlagan va stansiya atrofidagi 160 mingdan ziyod aholi o‘z uyini tark etishga majbur bo‘lgan. Yaponiya hukumatining Fukusimadagi hayotni qayta tiklashga bo‘lgan sa’y-harakatlariga qaramay, aksariyat mahalliy aholi radioaktiv ta’sir xavfi va infratuzilmaning yetishmasligi sababli xaroba hududlarga qaytishni istamayapti.
Bahorda Yaponiya hukumati Fukusima AESning tozalangan radioaktiv suvlarini okeanga chiqarib yuborishga qaror qildi. Mahalliy OAV ma’lumotlariga ko‘ra, Fukusimaning chiqindi suvlari maxsus omborlarda saqlanadi, ular tozalangan, lekin tarkibida avvalgidek radioaktiv tritiy mavjud.
Hukumat qaroriga ko‘ra, AESdagi radioaktiv moddalardan tozalangan suv ikki yildan so‘ng Tinch okeaniga quyilishni boshlaydi. Xitoy bunga norozilik bildirgan, AQSh esa qarorni qo‘llab-quvvatlagan.
Izoh (0)