Facebook ижтимоий тармоғида Наманган шаҳар Ички ишлар органлари фаолиятини мувофиқлаштириш бошқармаси 2-сонли ИИБ ҲПБ профилактика инспектори, катта лейтенант, 2011–2015 йилларда ИИВ академиясида таҳсил олган, ҳуқуқшунос С.О.нинг Республика ички ишлар вазири Пўлат Бобожоновга йўллаган видеомурожаати тарқалди.
Унда мурожаат эгаси иш ўрнида содир бўлаётган ноқонуний хатти-ҳаракатлар юзасидан шикоят қилган.
Унинг видеомурожаатда айтган сўзларига кўра, Наманган шаҳар ИИО ФМБ 2-сонли ИИБ раҳбари, майор А.С. қўл остидаги профилактика инспекторларига ҳар куни бештадан маъмурий баённома тузиш, бир йилда 2 та маъмурий назорат ўрнатиш каби ноқонуний талабларни режа қилиб белгилаб берган. Бу режаларни бажармаган ходимларга ишдан ҳайдаш билан таҳдид қилинган. ҲПБ бошлиғи, подполковник Б.И.га 50 АҚШ доллари берилса, режа бажарилган деб белгилаб қўйилган.
Катта лейтенант ушбу мурожаатида ходимларга юқоридаги каби жарима «план»лари белгилаб қўйилгани, бўлимда таниш-билишчилик ва қариндош уруғчилик, мансабни суиистеъмол қилиш каби ноқонуний ҳаракатлар авж олганини таъкидлаб ўтади. Мурожаатчининг таъкидлашича, буйруқни бажармай ўз ҳақ-ҳуқуқларини талаб қилган ходимлар куракда турмайдиган сўзлар билан ҳақоратланади ва босим ўтказилади.
Мавзуга доир: Фарғона вилояти ИИБ вазир Пўлат Бобожоновга видеомурожаат йўллаган собиқ инспектор тўғрисида маълумот берди
Қайд этилишича, 2021 йил сентябрь ойида фуқаро М.Й.нинг катта лейтенант С.О.нинг хатти-ҳаракатларидан норози бўлиб ёзган аризасига асосан ўтказилган хизмат текшируви давомида катта лейтенант С.О. 2021 йил бошларида Наманган шаҳрида яшовчи, 1975 йилда туғилган фуқаро ва унинг бирга яшовчи ўғли, 1994 йилда туғилган фуқаро ва Наманган шаҳрининг Давлатобод туманида яшовчи, 1982 йилда туғилган фуқароларга кредит олиб беришни ваъда қилиб, ишончига кирган.
Уларнинг шахсига оид ҳужжатлари нусхаларини олиб, сўнг расмий ҳужжатлигини била туриб, сохта маълумотлар киритган Ушбу фуқароларнинг номларига «Халқ банки» орқали 81 400 000 сўм кредит олиб, кўп миқдордаги мулкларини қўлга киритиб, ўзининг эҳтиёжлари учун ишлатиб юборгани аниқланган. Текширув якунига кўра 2021 йилда катта лейтенант С.О.ни эгаллаб турган лавозимидан озод этилиши ҳақида хулоса қилинган.
Наманган вилояти ИИБнинг хизмат текшируви хулосаси ва тўпланган ҳужжатлар, аниқланган ҳолатларга ҳуқуқий баҳо бериш учун Наманган шаҳар прокуратурасига юборилган.
Прокуратура органлари томонидан ўтказилган терговга қадар текширув якунига кўра, юқоридаги ҳолат юзасидан 2021 йил 21 октябрда Жиноят кодексининг 168-модда 3-қисми «б, в» бандлари (такроран ёки хавфли рецидивист томонидан, хизмат мавқейидан фойдаланиб содир этилган фирибгарлик) билан жиноят иши қўзғатилиб, дастлабки тергов ҳаракатлари олиб борилмоқда.
Бош прокуратура матбуот хизматининг хабар қилишича, Наманган шаҳар ИИБ собиқ профилактика инспектори С.О. бошқа фуқароларнинг номига олинган жами 81,4 миллион сўм кредит маблағларини талон-торож қилгани ҳолати юзасидан Жиноят кодексининг 168- ва 209-моддалари (мансаб сохтакорлиги) билан жиноят иши қўзғатилган.
Гумонланувчи турли баҳоналар билан терговга келишдан бош тортиб, яширингани сабабли унга нисбатан сиртдан айб эълон қилиниб, 13 ноябрь куни судининг ажрими билан қамоққа олиш эҳтиёт чораси қўлланилган ва унга нисбатан қидирув эълон қилинган.
Олиб борилган тезкор қидирув тадбирлари натижасида 14 ноябрь куни айбланувчи ушланиб, ҳимоя ҳуқуқлари таъминланган ҳолда терговга жалб қилинган. Ҳозирда тергов ҳаракатлари олиб борилмоқда.
Изоҳ (0)