Qozog‘istonda ro‘yxatdan o‘tgan Tiksi LTD korxonasi O‘zbekistondagi Mega Eco Export jamiyatiga yetkazib bergan bug‘doy yormasi uchun umumiy hisobda bir million dollardan ziyod mablag‘ini undira olmayapti. Bu haqda Tiksi LTD korxonasi direktori Aleksandr Loza “Daryo”ga murojaat qildi.
Ma’lum bo‘lishicha, Qozog‘istonda ro‘yxatdan o‘tgan Tiksi LTD korxonasi va O‘zbekistondagi Mega Eco Export jamiyati o‘rtasida 2018-yilning yanvar oyida bug‘doy yormasini yetkazib berish bo‘yicha umumiy qiymati 5 million 500 ming dollarlik shartnoma imzolangan. Kelishuvga ko‘ra, mahsulot yetkazib beruvchi Tiksi LTD korxonasi tomonidan 2018-yilning iyul–avgust oylarida Mega Eco Export jamiyatiga tonnasi 756 dollardan jami 1 million 400 ming tonna mahsulot yetkazib berilgan. Ammo Mega Eco Export korxonasi 1 million 71 ming dollarlik mahsulotni qabul qilib olgan bo‘lsa-da, mablag‘larni yetkazib beruvchiga ko‘rsatilgan muddatda to‘lab bermagan.
“Qarzni qaytarish bo‘yicha og‘zaki hamda yozma murojaatlar qildik, foydasi bo‘lmadi. Biz ham tadbirkormiz, kredit olib, biznes qilamiz. Mahsulot uchun olingan pullar bank kreditlari hisobiga olinganligi, ushbu pullar bo‘yicha korxonaning kredit majburiyati borligi haqida Mega Eco Export korxonasiga bir necha marotaba tushuntirdik, lekin natija yo‘q. Har gal har xil bahonalar qilib, pulimizni qaytarishni ortga surib kelishdi”, – dedi Tiksi LTD korxonasi rahbari Aleksandr Loza.
Bu orada Mega Eco Export jamiyati Tiksi LTD korxonasidan bug‘doy yormasini yetkazib berishni to‘xtatmaslikni, O‘zbekistonda bug‘doyning narxi bir necha barobar qimmatligini aytib, yana mahsulot yetkazib berishlarini so‘raydi.
“Mega Eco Export jamiyati rahbariyati bizga aloqaga chiqib, bug‘doyga O‘zbekistonda talab katta, yuboraveringlar, avvalgi yuborgan mahsulotlaringning pullari sotgan korxonalardan yetib kelmadi, ozroq kutinglar, yana mahsulot jo‘natsanglar, pulini avvalgi qarzimizga qo‘shib, tez orada qaytaramiz, deb va’da berishdi. Biz ularning gapiga ishonib, 2019-yilning fevral oyida Mega Eco Export jamiyatiga 214 ming dollarlik bug‘doy mahsuloti yetkazib berdik. Yana va’da qilingan vaqtda pulni qaytarishmadi. Ular Mega Eco Export jamiyatida soliq idorasi tekshirish o‘tkazib, korxona hisob raqamiga taqiq qo‘yilganini, tekshirish yakunidan so‘ng pul mablag‘ini to‘lab berishini aytishdi. Lekin haligacha Mega Eco Export jamiyati Tiksi LTD korxonasi oldidagi ikki shartnoma bo‘yicha 1 million 260 ming dollarlik qarzni qaytarmayapti”, — dedi Aleksandr Loza.
Ikki o‘rtada kelishuv shartnomasi bo‘lsa, nima uchun sudga murojaat qilmaysizlar, degan savolga Tiksi LTD korxonasi rahbari quyidagicha javob berdi:
“To‘g‘ri, o‘rtada shartnoma bor, bu orqali sudga murojaat qilishimiz va yutib chiqishimiz mumkin. Bilishimizcha, Mega Eco Export jamiyatining oldimizdagi qarzdorlikni qaytarish imkoniyati yo‘q. Birinchidan, ularning hisob raqamiga taqiq qo‘yilgan. Ikkinchidan, mahsulot sotishgan bo‘lsa-da, o‘z hisobiga kirim qilishmagan. Bizni hayron qoldirgan narsa — bunga O‘zbekistondagi huquq-tartibot idoralari e’tibor qilishmayapti. Prokuraturaga ham yozdik, foydasi bo‘lmadi, sudga murojaat qilinglar, degan javob keldi”, — dedi Aleksandr Loza.
Holatga oydinlik kiritish maqsadida “Daryo” muxbiri Mega Eco Export jamiyatiga murojaat qildi. Jamiyat rahbari Alisher Asqarovning aytishicha, Tiksi LTD korxonasi bildirayotgan fikrlar asossiz.
“Haqiqatan ham bug‘doy yormasini yetkazib berish bo‘yicha Tiksi LTD korxonasi bilan shartnoma tuzganmiz. Biz ulardan mahsulot sotib olib, O‘zbekistondagi korxonalarga sotamiz. Tiksi LTD korxonasi bilan xalqaro savdo uchun yaratilgan elektron baza orqali shartnoma tuzganmiz. Barcha sotib olingan, qabul qilingan mahsulotlar o‘sha orqali hisob-kitob qilingan va pullar o‘z vaqtida to‘lab berilgan. Aslida biz ulardan emas, ular bizdan qarzdor. Bularning barchasi elektron kelishuvlarimizda ko‘rinib turibdi”, — dedi Mega Eco Export jamiyati rahbari.
Mega Eco Export jamiyati rahbari Alisher Asqarov shartnomalarning elektron ko‘rinishidan nusxa yuborishini aytdi. Lekin aytilgan vaqtdan bir necha oy o‘tgan bo‘lsa-da, hujjatlar “Daryo” tahririyatiga taqdim etilmadi.
O‘ylaymizki, O‘zbekistondagi tadbirkorlarni qo‘llab-quvvatlash uchun mas’ul idoralar va huquqni muhofaza qiluvchi organlar ikki tadbirkor o‘rtasidagi masalaga qonuniy yechim ko‘rsatishadi.
Izoh (0)