“Mutlaq monarxiyaga — yo‘q”. Tailandda minglab kishilar qirollikda islohotlar o‘tkazish talabi bilan yana namoyishga chiqdi (foto)

Tailandda minglab odamlar mutlaq monarxiyaga qarshi namoyishga chiqdi. Bu haqda Reuters xabar berdi.

Mamlakatda Konstitutsiyaviy sudning Tailandda islohotlar o‘tkazishga chaqirishlar noqonuniy ekani haqidagi qarori norozilik namoyishlarining yangi to‘lqiniga sabab bo‘ldi. Namoyishchilar Bangkokda sudyalarning modellarini yoqib yubordi.

“Mutlaq monarxiyaga — yo‘q” va “Islohot — bekor emas” degan yozuvli plakatlarni ko‘tarib olgan namoyishchilar qalqon ortidagi politsiyachilar safiga qarshi yurdi.

“So‘nggi yillarda qirolning kuchayib borayotgan vakolatlari Tailandni demokratiyadan uzoqlashtirdi va mutlaq monarxiyaga qaytardi. Bu kurashning maqsadi — mamlakat shunday tizim tomonidan boshqarilishi kerakki, unda hamma teng bo‘lishi zarur”, — deyiladi namoyishchilar bayonotida.

Yuzlab namoyishchilar poytaxtdagi Demokratiya monumenti oldiga borishni rejalashtirishgandi, biroq politsiya ularning yo‘llarini to‘sib qo‘yganidan keyin ular manzilni o‘zgartirib, Germaniya elchixonasiga yo‘l olgan. Bunga 10-noyabr kuni Tailand qiroli Maha Vachiralongkorn bir yillik tanaffusdan so‘ng ilk bor Germaniyaga tashrif buyurgani haqidagi xabarlar sabab bo‘ldi. Nemis ommaviy axborot vositalarining yozishicha, monarx Germaniyaga 250 nafar mulozimlari bilan kelgan va Hilton Airport mehmonxonasining to‘rtinchi qavatini kamida 11 kunga bron qilgan.

2020-yilning kuzida ham namoyishchilar Germaniya Federativ Respublikasi elchixonasiga kelib, Germaniyani qirol u yerdaligida davlat ishlarini olib borganmi yoki yo‘qligini tekshirishga chaqirgan.

Xabarga ko‘ra, miting chog‘ida uch nafar demokratiya tarafdori yaralangan, biroq jarohat sabablariga aniqlik kiritilmagan. Politsiya voqealar yuzasidan tergov olib borilayotganini ta’kidlagan.

“Inson huquqlari uchun tailandlik huquqshunoslar” guruhi tuzgan ma’lumotlarga ko‘ra, namoyishlar boshlangan 2020-yildan beri kamida 157 kishi monarxiyaga tuhmat qilganlik uchun 15 yilgacha qamoq jazosini nazarda tutuvchi qonun bo‘yicha ayblangan.

2019-yilda Tailandda bo‘lib o‘tgan parlament saylovlaridan keyin Konstitutsiyaviy sud mamlakatning asosiy muxolifat kuchi — Kelajak partiyasi faoliyatini taqiqlab qo‘ygan edi. Uni asosan yoshlar qo‘llab-quvvatlagani sababli 2020-yil boshida talabalar kampuslarida mahalliy norozilik aksiyalari tashkil qilingan, ammo koronavirus pandemiyasi boshlangach ular tinchib ketgan. Koronavirus cheklovlarining ko‘pchiligi bekor qilingach, norozilik namoyishlari tanaffuslar bilan yanada kengroq ko‘lamda o‘tkazilmoqda.