Adliya vazirligi Konstitutsiyaviy sud bilan hamkorlikda Konstitutsiya kuni (8-dekabr) munosabati bilan fuqarolarning davlatning asosiy qonuni haqidagi bilimlarini sinash maqsadida umummilliy Konstitutsiya imtihoni o‘tkazadi.
Vazirlik matbuot xizmatining xabar berishicha, imtihonda 15 yoshga to‘lgan va undan katta barcha fuqarolar qatnashishi mumkin. Unda ishtirok etish ixtiyoriy, bepul va barcha uchun ochiq.
Buning uchun har bir 8-dekabr.adliya.uz saytidan ro‘yxatdan o‘tish kerak. Ro‘yxatdan o‘tish 30-noyabrga (shu kuni ham) qadar davom etadi.
Imtihon ikki bosqichda o‘tkaziladi.
Birinchi bosqich 1-dekabr kuni soat 09:00 dan 13:00 gacha onlayn tarzda bo‘lib o‘tadi. Ishtirokchilarga 20 ta test savoli va 1 ta ijodiy savol beriladi.
Test savollarining barchasiga eng qisqa muddatda to‘g‘ri javob bergan ishtirokchilar orasidan 50 nafari tanlab olinib, ularning ijodiy savolga berilgan javoblari ko‘rib chiqiladi. Baholash natijasiga ko‘ra eng yuqori ball to‘plagan 10 nafar ishtirokchi navbatdagi bosqichga o‘tadi.
Ikkinchi bosqich bosqich 8-dekabr — Konstitutsiya bayrami arafasida tashkil etilib, onlayn translyatsiya qilinadi. Bunda har bir ishtirokchiga 10 tadan savol beriladi. Yakunda eng yuqori natijani qayd etgan 3 nafar ishtirokchi g‘olib deb topiladi.
G‘oliblar quyidagicha taqdirlanadi:
- birinchi o‘rin — 15 million so‘m;
- ikkinchi o‘rin — 10 million so‘m;
- uchinchi o‘rin — 5 million so‘m.
Izoh (0)