Shavkat Mirziyoyev raisligidagi videoselektor yig‘ilishi bo‘lib o‘tdi. Bu haqda davlat rahbari matbuot kotibi Sherzod Asadov ma’lum qildi.
“Har bir hududda saylovoldi uchrashuvlarda xalqimiz bilan birga katta-katta marralarni belgilab oldik. Oldimizda turgan eng muhim vazifa — ushbu dasturlarni mahallagacha tushirib, ijrosini ta’minlash hisoblanadi.
Bugungi kunga qadar shakllangan dastur loyihalari eskicha qolipda tayyorlangan va birortasida ‘ega-kesim’ yo‘q, birorta viloyat hokimi buni o‘zidan o‘tkazmagan.
Shu bois 2022-yildan berilayotgan mablag‘lar va yaratilayotgan imkoniyatlar mahallaning ehtiyojidan kelib chiqib belgilanadi. Bunda mahallada ish o‘rinlari yaratish va kambag‘allikni qisqartirish asosiy mezon bo‘ladi.
Bu ishlarni amalga oshirishga hokim yordamchilari mas’ul bo‘ladi”, — dedi davlat rahbari yig‘ilish avvalida.
Bundan avval Namanganda 65 gektarlik “Yangi O‘zbekiston” bog‘i barpo etilishi, O‘zbekistonda 2022-yil 1-yanvardan 10 mingga yaqin mahallada hokim yordamchilari ish boshlashi hamda O‘zbekiston bo‘ylab moliya-iqtisodiyot sektori xodimlari majburan mahallada hokim yordamchisi lavozimiga o‘tkazilayotgani haqida xabar berilgandi.
Izoh (0)