O‘zbekistonda o‘zaro qarindoshlarning davlat korxonasida biri ikkinchisiga bo‘ysunib ishlashi taqiqlanishi mumkin

O‘zbekistonda o‘zaro yaqin qarindoshlarni ishga olganlik uchun jarima ko‘zda tutilgan qonun loyihasi jamoatchilik muhokamasi uchun e’lon qilindi. Hujjat bilan Mehnat kodeksiga qarindoshlarni ishga olishni taqiqlash, Ma’muriy javobgarlik to‘g‘risidagi kodeksga esa buni buzganlik uchun jarima belgilash ko‘zda tutilgan o‘zgartirish va qo‘shimchalik kiritish rejalashtirilgan.

Unga ko‘ra, o‘zaro yaqin qarindosh yoki quda-anda bo‘lgan shaxslarning (katta bobo-buvilar, bobo-buvilar, ota-onalar, o‘g‘il va qizlar, nevara va evaralar, er-xotinlar, shuningdek, er-xotinlarning ota-onalari, aka-ukalari, opa-singillari va bolalari), basharti ulardan biri ikkinchisiga bevosita bo‘ysunib yoki uning nazorati ostida xizmat qiladigan bo‘lsa, bir davlat korxonasi va uning tarkibidagi tuzilmalarda birga xizmat qilishlari taqiqlanadi.

O‘zaro qarindoshlarning (aka-uka, opa-singil, ularning bolalari, ota-onaning aka-uka va opa-singillari hamda ularning bolalari, bobo va buvilarning aka-uka hamda opa-singillari va ularning bolalari hamda shunga o‘xshashlar), bir davlat tashkiloti va uning tarkibidagi tuzilmalar biri ikkinchisiga bevosita bo‘ysinuvida yoki uning nazorati ostida bo‘lganda xizmat qilishiga yo‘l qo‘yilmaydi.

Davlat xizmatchisi o‘zaro qarindoshlik rishtalariga ega bo‘lgan shaxs bilan xizmat qilayotganligi o‘ziga ma’lum bo‘lgan vaqtdan boshlab 10 kun muddat ichida davlat tashkiloti rahbariga bu haqida xabar berishi lozim.

Shuningdek, ushbu holatlar xodim bilan mehnat shartnomasi tuzilgandan so‘ng aniqlangan taqdirda, ish beruvchi ushbu xodimlardan birini, biri ikkinchisiga bevosita yoki uning nazorati ostida bo‘lmagan avvalgisiga teng boshqa ish (lavozim)ga o‘tkazish choralarini ko‘rishi shart.

O‘zaro yaqin qarindosh bo‘lgan shaxslarning bir davlat tashkiloti va uning tarkibidagi tuzilmalarda biri ikkinchisiga bevosita bo‘ysunib yoki uning nazorati ostida xizmat qilayotganligi haqida ish beruvchiga ma’lum qilmaslik, BHMning 15 baravaridan 20 baravarigacha (4 million so‘mdan 5,4 million so‘mgacha) miqdorda jarima solish ko‘zda tutilmoqda

Bu haqda bilgan ish beruvchi ushbu xodimlar ishlab kelgan ish (lavozim)ga teng boshqa ish (lavozim)ga o‘tkazish choralarini ko‘rmaganlik uchun esa BHMning 25 baravaridan 30 baravarigacha (6,7 million so‘mdan 8,1 million so‘mgacha) miqdorda jarima solish rejalashtirilgan.

Ushbu hujjat loyihasi muhokamasi 30-noyabrgacha davom etadi.