Адлия вазирлиги Конституциявий суд билан ҳамкорликда Конституция куни (8 декабрь) муносабати билан фуқароларнинг давлатнинг асосий қонуни ҳақидаги билимларини синаш мақсадида умуммиллий Конституция имтиҳони ўтказади.
Вазирлик матбуот хизматининг хабар беришича, имтиҳонда 15 ёшга тўлган ва ундан катта барча фуқаролар қатнашиши мумкин. Унда иштирок этиш ихтиёрий, бепул ва барча учун очиқ.
Бунинг учун ҳар бир 8-dekabr.adliya.uz сайтидан рўйхатдан ўтиш керак. Рўйхатдан ўтиш 30 ноябрга (шу куни ҳам) қадар давом этади.
Имтиҳон икки босқичда ўтказилади.
Биринчи босқич 1 декабрь куни соат 09:00 дан 13:00 гача онлайн тарзда бўлиб ўтади. Иштирокчиларга 20 та тест саволи ва 1 та ижодий савол берилади.
Тест саволларининг барчасига энг қисқа муддатда тўғри жавоб берган иштирокчилар орасидан 50 нафари танлаб олиниб, уларнинг ижодий саволга берилган жавоблари кўриб чиқилади. Баҳолаш натижасига кўра энг юқори балл тўплаган 10 нафар иштирокчи навбатдаги босқичга ўтади.
Иккинчи босқич босқич 8 декабрь — Конституция байрами арафасида ташкил этилиб, онлайн трансляция қилинади. Бунда ҳар бир иштирокчига 10 тадан савол берилади. Якунда энг юқори натижани қайд этган 3 нафар иштирокчи ғолиб деб топилади.
Ғолиблар қуйидагича тақдирланади:
- биринчи ўрин — 15 миллион сўм;
- иккинчи ўрин — 10 миллион сўм;
- учинчи ўрин — 5 миллион сўм.
Изоҳ (0)