“Belarus chegarada ziddiyat yuzaga kelishini istamaydi” — Lukashenko

Belarus chegarada ziddiyat yuzaga kelishini istamaydi, dedi respublika prezidenti Aleksandr Lukashenko 15-noyabr kuni Minskdagi uchrashuvda.

“Biz davlatimiz chegarasida hech qanday ziddiyat bo‘lishini istamaymiz. Bu biz uchun mutlaqo noto‘g‘ri”, — deya uning so‘zlarini keltirdi Prezident matbuot xizmatiga yaqin bo‘lgan “Pul Pervogo” Telegram kanali.

Lukashenkoning fikricha, bunday qarama-qarshilik Polshaga kerak. “Ichki va Yevropa Ittifoqi bilan bog‘liq muammolar yetarlicha ko‘p – bu olomon esa davlat chegarasida otishma boshlayapti”, — dedi u.

Davlat rahbari, shuningdek, Belarus qochqinlarni vataniga qaytarishga tayyorligini, biroq ularning o‘zi qaytishni istamayotganini aytdi.

Polsha va Belarus chegarasidagi vaziyat 8-noyabr kuni Yaqin Sharq davlatlaridan kelgan bir necha ming muhojir Belarus tomonidan Polsha bilan chegaraga yaqinlashib, Yevropa Ittifoqiga ko‘chib o‘tmoqchi bo‘lganidan keyin yanada murakkablashdi. Polsha hukumati bu voqealarni chegaradagi inqiroz boshlanganidan beri eng og‘ir lahza deb baholadi.

Polsha, Litva va Latviya so‘nggi oylarda Belarus orqali Yevropa Ittifoqiga kirishga urinayotgan noqonuniy muhojirlar oqimi ortayotganini qayd etdi. Yevropa Ittifoqi Belarusni Ittifoq chegaralari yaqinida tartibsizliklar yaratishda ayblamoqda. Boltiqbo‘yi davlatlari Belarus hukumatini muhojirlar oqimini atay uyushtirganlikda ayblab, buni “gibrid tajovuz” deb atamoqda. Yevropa Komissiyasi ham xuddi shunday pozitsiyada.

Yevropa Ittifoqi Belarusga qarshi sanksiyalarni, jumladan, iqtisodiy sanksiyalarni kuchaytirishni rejalashtirmoqda. “Lukashenko bizdan barcha sanksiyalarni olib tashlashimizni talab qilmoqda, bugun biz o‘z javobimizni beramiz, sanksiyalarni kuchaytiramiz. Noqonuniy yuk tashish bilan shug‘ullanayotgan ayrim shaxslarga nisbatan qattiqroq kurashamiz”, — dedi jurnalistlarga Germaniya tashqi ishlar vaziri Xayko Maas 15-noyabr kuni Bryusselda. Uning so‘zlariga ko'ra, “qattiq iqtisodiy sanksiyalarning e’lon qilinishi muqarrar”.

Avvalroq Yevropa Ittifoqi Minsk aeroportiga qarshi sanksiyalar joriy etish imkoniyatini ko‘rib chiqayotgani xabar qilingandi.